दमक, २८ चैत / जैन धर्मका प्रवर्तक महावीर जैनको आज २६२४ औं जन्मयन्ती परेको छ । सत्य, अहिंसा र ब्रह्मचार्यको सन्देश प्रवाह गर्ने जैनको जैन धर्मअनुयायीले जन्मजयन्ती मनाइँदैछन् ।
विशेषगरी जैन धर्मावलम्बी तथा श्रावकले अहिंसामूलक यो धर्मका प्रवर्तकको स्मरणका साथ यो दिवस मनाउने गर्दछन् ।
इसापूर्व ५९९ मा चैत्र शुक्ल त्रयोदशीका दिन राजपरिवारमा जन्मिएका महावीर जैन तपस्या गर्न दरबार त्यागेर हिँडेको जैन ग्रन्थमा उल्लेख छ । अहिंसा, सत्य र आफूलाई चाहिनेभन्दा बढी केही बस्तु संग्रह नगर्ने महावीरको सन्देश हो ।
नेपालमा वैदिक, बौद्ध, जैन, शिखलगायत समुदायबाट प्रत्येक वर्ष उत्साहपूर्वक महावीर जयन्ती मनाउने गरिएको छ ।
राष्ट्रपति रामचन्द्र पौडेलले जैन धर्मका प्रवर्तक महावीरको जन्मजयन्तीका अवसरमा स्वदेश तथा विदेशमा रहेका सम्पूर्ण नेपाली जैन धर्मावलम्बी दिदीबहिनी तथा दाजुभाइहरूमा सुख, शान्ति र समृद्धिका शुभकामना व्यक्त गर्दै उहाँको अहिंसाको बाटो पछ्याउन आवश्यक रहेको बताउनु भएको छ ।
