दमक, २९ चैत / तीनकुनेको प्रदर्शन स्थलबाट फरार भएका झापाको बिर्तामोडस्थित बी एण्ड सी अस्पतालका सञ्चालक एवम् राजावादी आन्दोलनका अगुवा दुर्गा प्रसाईँलाई भारतीय प्रहरीको सहयोगमा आसामबाट पक्राउ गरेर नेपाल ल्याइँदै छ ।
झापाको काँकडभिट्टा नाकामा प्रसाईँ समर्थकहरू भेला भएपछि सुरक्षा विश्लेषणको आधारमा नाका परिवर्तन गरेर प्रसाईंलाई भद्रपुर विमानस्थल हुँदै काठमाडौँ लाने प्रहरीको तयारी छ ।
चैत १५ मा प्रसाईँ नेतृत्वको ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’ ले काठमाडौँको तीनकुनेमा प्रदर्शन आयोजना गरेको थियो । पूर्वराजाको पक्षमा आयोजित प्रदर्शनमा नवराज सुवेदी नेतृत्वको ‘राजसंस्था पुनर्स्थापनाका लागि संयुक्त जनआन्दोलन समिति’ पनि सहभागी थियो । सुवेदीलाई गौरीघाट स्थित घरमै नजरबन्द गरिएको छ ।
प्रसाईँ भने त्यहाँबाट भागेर भारत पुगी सामाजिक सञ्जालमा दुईवटा भिडियो सन्देश पोस्ट गरेर आफू नेपालमै भएको तर ‘जोगिएर’ बसेको बताउनु भएको थियो । प्रहरीले खोजी गरिरहेको अवस्थामा असमस्थित कांग्रेस आईका एकजना स्थानीय नेताको घरमा लुकेर बसेको पत्ता लाग्यो । त्यसपछि प्रहरीले बिहीबार पक्राउ गरेको सुरक्षा स्रोतले बताएको छ । तर बिहीबार भनें सुरक्षा निकायले प्रसाईं पक्राउ परेको कुरा निराधार भएको बताएको थियो । प्रसाईँ विरुद्ध राज्य विरुद्धको कसुर र सङ्गठित अपराधमा मुद्दा चलाइने प्रहरी अधिकृतहरू बताउँछन् ।
