विराटनगर, २९ चैत / २०८२ साललाई पर्यटन वर्ष घोषणा गरेको कोशी प्रदेश सरकारले भारतीय पर्यटकको सहजताका लागि सीमा नाकामा सुरक्षा जाँच कार्ड वितरण गर्न थालेको छ ।
नेपालमा धेरै स्थानमा सुरक्षा जाँचका नाममा दुःख दिने गरेको भारतीय पर्यटकको गुनासो रहेको अवस्थामा पर्यटन वर्ष मनाउने घोषणा गरेको सरकारले पर्यटक भित्र्याउनका लागि रुट परमिट र सुरक्षा जाँचको कार्ड बाँड्ने योजना ल्याएर शुक्रबारबाट कार्ड वितरण थालेको छ ।
पर्यटकका यातायातका साधनलाई सीमा नाकाबाहेक बाहिर सुरक्षा जाँच नगर्ने गरी नाकामा सुरक्षा जाँच र रुट परमिट कार्ड वितरण थालिएको कोशी प्रदेशको आन्तरिक मामिला तथा कानुन मन्त्रालयका प्रवक्ता कमल थापाले जनाउनु भयो । नेपाल प्रवेश गर्ने नाकामा स्टिकर टाँसेपछि पर्यटक बस वा अरु भारतीय साधनलाई अन्य स्थानमा सुरक्षा जाँचका लागि रोकिनु नपर्ने व्यवस्था गरिएको उहाँले उल्लेख गर्नुभयो । यसरी बाँडिने कार्डमा ‘कोशी प्रदेश पर्यटन वर्ष–२०८२, विदेशी साधनको अस्थायी रुट इजाजत पत्र तथा सुरक्षा जाँच कार्ड’ लेखिएको छ ।
विराटनगरको रानी, झापाको काँकडभिट्टा, इलामको पशुपतिनगर र सुनसरीको कोशी पुलमा छुट्टै युनिट राखेर सुरक्षा जाँचपछि सुरक्षा जाँच र परमिटको कार्ड वितरण गरिने छ । कार्डमा कोशी प्रदेश आन्तरिक मामिला तथा कानुन मन्त्रालय र कोशी प्रदेश प्रहरी कार्यालयको सम्पर्क नम्बर राखिएको छ ।
