दमक, २९ चैत / यो कुनै कार्यक्रमको तयारीको दृष्य पनि होइन । न कि कुनै विशिष्ट पाहुनाको आगमनको स्वागतको नै हो । भारततर्फबाट आउने ती व्यक्ति जसलाई पत्रकारहरुले पनि यसरी पछ्याइरहेका थिए ।
प्रहरीको वारेन्टमा परेका व्यक्तिको पो पर्खाइ थियो त्यो । पूर्वराजावादीको गतिविधि उकास्ने काममा सामेल दुर्गा प्रसाईंको गिरफ्तारीपछिको दृष्य हो । बिहीबार भारतको असममा भारतीय प्रहरीबाट पक्राउ प्रसाईंलाई शुक्रबार नेपाल बुझाएपछि पत्रकारहरुले त्यो दृष्य छायांकन गर्न, फोटो खिच्न र अवस्था बुझ्न यो दौडधुप गरे ।
झापाको काँकडभिट्टा नाकाबाट प्रसाईंलाई नेपाल ल्याइँदै गरेको जानकारी पाएपछि उहाँका समर्थकहरु काँकडभिट्टा भेला भए । पत्रकारहरुले त त्यो अवस्थाको समाचार संकलन गर्नुनै थियो । काँकडभिट्टामा बढ्ने भिडभाडले सुरक्षा चुनौति आउन सक्ने बुझेर दक्षिणपट्टिको गलगलिया नाकाबाट भित्र्याउने सोच समेत बनेको विषय बाहिर आयो । तर कडा सुरक्षाबीच भारतीय प्रहरीबाट प्रसाईंलाई जिम्मा बुझेर नेपाल प्रहरीले काँकडभिट्टाको मुख्य नाकाबाटै भित्र्यायो ।
आईजीपीको सचिवालयले विज्ञप्ति निकाल्दै दुर्गा प्रसाईँ र उनका बडिगार्ड दिपक खड्कालाई शुक्रबार भद्रपुरबाट नियन्त्रणमा लिई आवश्यक अनुसन्धानको लागि काठमाडौं लगिएको छ ।
चैत १५ गते पूर्वराजावादीको कार्यक्रम अन्तर्गत तीनकुनेको आन्दोलनलाई उत्तेजित बनाएर फरार रहेका प्रसाईँ नेपाल प्रहरीसँगको समन्वयमा आसाम प्रहरीले नियन्त्रणमा लिएको थियो । आज नेपाल–भारत सीमावर्ती क्षेत्रबाट बुझाइएसँगै प्रसाईं नेपाल प्रहरीको नियन्त्रणमा नेपाल प्रवेश हुन पुगेको देखिन्छ ।
प्रसाईँलाई चन्द्रगढी विमानस्थलहुँदै बुद्ध एयरको जहाजबाट हतकडी लगाएर धकेल्दै विमानमा चढाएको देखिन्छ । काठमाडौं पुर्याएसँगै प्रहरीले २ जनाको ज्यान जानेगरिको हिंसात्मक गतिविधि सम्बन्धि मुद्धामा म्यादथपलगायतको प्रक्रिया पूरा गरेर अनुसन्धान सुरू गर्नेछ ।
