दमक, ३१ चैत / पर्साको वीरगञ्जमा दुई समुदायबिच उत्पन्न विवादलाई समाधान गर्नका लागि आइतबार सर्वपक्षीय बैठक सुरु भएको छ ।
हनुमान जयन्तीको अवसरमा हिजो निकालिएको शोभायात्राका क्रममा भएको विवादपछि उत्पन्न तनावकोस्थितीलाई समाधान गर्नका लागि जिल्ला प्रशासन कार्यालयले सर्वदलीय बैठक गराएको हो । बिहानबाट बैठक सुरु भएको पर्साका प्रमुख जिल्ला अधिकारी गणेश अर्यालले बताउनु भयो ।
स्थानीय प्रशासनले शनिबार साढे ६ बजेदेखि आइतबार बिहान १२ बजेसम्मका लागि कर्फ्यु आदेश जारी गरेको थियो । स्थितिलाई नियन्त्रणमा लिन अहिले सेना परिचालन गरिएको छ ।
हिन्दु धर्मावलम्बीहरूको जयन्तीको अवसरमा शनिबार वीरगञ्जमा शोभायात्रा निकालिएको थियो । शोभायात्रामा सहभागीहरूले उच्छृङ्खल गतिविधि गरेको भन्दै अर्को समूहले आरोप लगाएपछि अवस्था झडपमा परिणत भएको बताइएको छ ।
शोभायात्रामा सहभागीहरूले भने मुस्लिम समूहले मस्जिदबाट ढुङ्गा हानेपछि विवाद सुरु भएको आरोप लगाइएको प्रहरीको भनाई छ ।
