दमक, ३१ चैत / पर्साको वीरगञ्जमा बढेको तनावलाई साम्य पार्न ३ बुँदे सहमति भएपनि स्थिति सान्य भइनसकेकाले पुन कर्फ्युको समय भने थपिएको छ ।
प्रमुख जिल्ला अधिकारी गणेश अर्यालले थप सूचना जारी गर्दै वीरगञ्ज नगरपालिका क्षेत्रमा लगाइएको कर्फ्यू आदेश आइतबार राति १२ बजेसम्मका लागि लम्बिएकोे बताउनु भएको छ । आइतबार दिउँसो १२ बजेसम्मको कर्फ्यु पुनः थपिएको हो ।
वार्तामा राजनीतिक दलहरूले शान्ति अमन चयनमा खलल हुने किसिमका धार्मिक एवं सामुदायिक प्रकारका –याली, बन्द लगायतका कार्यक्रम एवं गतिविधिहरू कुनै पनि संघ संस्था एवं समुदायले नगर्ने प्रतिबद्धता जनाएको समेत उहाँले जनाउनु भयो । विवाद उत्पन्न गर्ने कार्यमा संलग्न जो सुकै भए कानुनको दायरामा ल्याइ कडा कानुनी कारबाही गर्ने प्रतिबद्धता जनाइएको छ ।
स्थानीय प्रशासनले बैठकलगत्तै स्थानीय मुस्लिम अगुवाहरूसँग छुट्टै बैठक गर्ने र त्यसपछि पुनः सर्वदलीय सर्वपक्षीय बैठक गरेर अर्को निर्णय गर्ने तयारी गरी रहेको स्रोतले बताएको छ ।
जिल्ला प्रशासन कार्यालय पर्सामा विवाद समाधान गर्न दुई चरणको छलफल सकेर तेस्रो चरणको वार्ता चलिरहेको समयमा कार्यालयभित्र तनावको अवस्था देखिएको थियो ।
शनिवार हनुमान जयन्तीको शोभायात्राका क्रममा तनाव सिर्जना भएपछि वीरगञ्जमा प्रहरीले २ राउन्ड हवाई फायर र १२५ राउन्ड अश्रुग्यास प्रहार गरेको थियो ।
हनुमान जयन्तीको अवसरमा हिजो निकालिएको शोभायात्राका क्रममा भएको विवादपछि उत्पन्न तनावकोस्थितीलाई समाधान गर्नका लागि जिल्ला प्रशासन कार्यालयले सर्वदलीय बैठक गराएको हो । शनिबार साढे ६ बजेदेखि आइतबार बिहान १२ बजेसम्मका लागि कर्फ्यु आदेश जारी गरेको थियो । स्थितिलाई नियन्त्रणमा लिन सेना परिचालन गरिएको छ ।
हिन्दु धर्मावलम्बीहरूको जयन्तीको अवसरमा शनिबार वीरगञ्जमा शोभायात्रा निकालिएको थियो । शोभायात्रामा सहभागीहरूले उच्छृङ्खल गतिविधि गरेको भन्दै अर्को समूहले आरोप लगाएपछि अवस्था झडपमा परिणत भएको बताइएको छ । शोभायात्रामा सहभागीहरूले भने मुस्लिम समूहले मस्जिदबाट ढुङ्गा हानेपछि विवाद सुरु भएको आरोप लगाइएको प्रहरीको भनाई छ ।
