विर्तामोड, ३१ चैत । काठमाडौंको तीनकुनेमा भएको प्रदर्शनपछि सेलाएको नवराज सुवेदी नेतृत्वको ‘राजतन्त्र पुनर्स्थापनाका लागि संयुक्त जनआन्दोलन समिति’ ले झापामा पनि सक्रियता बढाएको छ ।
समितिका प्रवक्ता स्वागत नेपालको सक्रियतामा शाहीकालीन मन्त्री टेकनारायण राजवंशीलाई अघि सारेर झापामा पनि राजतन्त्र पुनर्स्थापनानिम्ति जनआन्दोलन चर्काउने टीम तयार पारिएको छ । यो टीमलाई तदर्थ समितिमात्र भनिएको छ । यही टीमले आउँदो शनिवार जिल्लाव्यापी भेला गरेर समितिलाई पूर्णता दिने योजना सुनाएको छ ।
राजतन्त्र पुनर्स्थापनाका लागि भन्दै तत्कालीन राष्ट्रिय पञ्चायतका अध्यक्ष नवराज सुवेदीको अध्यक्षतामा गठित संयुक्त जनआन्दोलन समितिले चैत १५ गते काठमाडौंको तीनकुनेमा भएको प्रदर्शनमा धनजनको व्यापक क्षति भएको थियो । सो प्रदर्शनमा कमान्डर तोकिएका दुर्गा प्रसाईंसहित राप्रपा नेता र केही अगुवा आन्दोलनकारी अहिले प्रहरी हिरासतमा छन् । संयोजक सुवेदीलाई पनि घरमै नजरवन्दमा राखिएको छ ।
तीनकुने प्रदर्शन अशान्त बनेपछि र प्रदर्शनका नाइकेहरु गिरफ्तार भएपछि राजावान्दी आन्दोलन मत्थर भएको धेरैको आँकलन थियो । यही बीचमा राजतन्त्र पुनर्स्थापनाका लागि गठित संयुक्त जनआन्दोलन समितिका पदाधिकारीहरु जिल्ला भेला गर्दै झापा आइपुगेका हुन् । काठमाडौंपछि झापामा जनआन्दोलन समिति गठन गरेका राजावादी समुहले यसलाई देशव्यापी बनाउँदै विदेशसम्म पनि फैलाउने योजना सुनाएका छन् । आइतवार विर्तामोडको एक रेस्टुरेन्टमा भेला भएका उनीहरुले अवको आन्दोलन झनै सशक्त हुने र त्यस आन्दोलनले राजतन्त्र पुनर्स्थापना गरिछाड्ने दाबी गरेका छन् ।
