दमक, ३१ चैत / प्रधानमन्त्री केपी शर्मा ओलीले अरुले बिगारेको अर्थतन्त्रलाई बल्ल सुबाटोतिर फर्काउन थालिएको बताउनु भएको छ ।
नेकपा एमालेका अध्यक्ष समेत रहनु भएको प्रधानमन्त्री ओलीले आइतबार झापाको गौरादहस्थित गौरादह नगर अस्पतालको भवन शिलान्यासका क्रममा बोल्दै सो कुरा बताउनु भएको हो । बजेट बनाउने बेला भएको अवस्थामा पहिले बिगारेकोस्थितिले त्यसलाई मेलो मिलाउन केही अप्ठेरो अवस्था सामना गर्दै त्यसपछि मात्र नयाँ योजना अघि बढ्ने समेत उल्लेख गर्नुभयो ।
झापा निर्वाचन क्षेत्र नम्बर ५ का सांसद समेत रहनु भएका ओलीले दमकमा चाँडै नै रंगशाला समेत बनाउने उहाँले जानकारी गराउनु भयो ।
गौरादह १ मा नगर अस्पतालका लागि २ विगाहा जग्गा दान गर्नुहुने २९ जनालाई सम्मान समेत गरिएको छ । हाल ३२ कठ्ठा जग्गा पास भइसकेको र बाँकी ८ कठ्ठा पास गर्ने क्रममा रहेको १ नम्बर वडाअध्यक्ष नगेन्द्र भण्डारीले जनाउनु भयो । अस्पतालका लागि स्थानीयबाट १५ लाख कठ्ठाका दरले ६ करोडको जग्गा दान भएको छ ।
कार्यक्रममा संघीय सरकारका भौतिक पूर्वाधार तथा यातायात मन्त्री देवेन्द्र दाहाल, कोशी प्रदेशका मुख्यमन्त्री हिक्मतकुमार कार्कीसमेतको आतिथ्यता रहेको थियो ।
संघीय सरकारले अस्पताल निर्माणका लागि २ वर्षे क्रमागत योजनाका रुपमा १२ करोड ५९ लाखमा ठेक्का लगाएको छ ।
