दमक, १ बैशाख / कोशी प्रदेशका मुख्यमन्त्री हिक्मतकुमार कार्कीले विगतका कामहरूको समीक्षा गर्दै नयाँ वर्ष २०८२ लाई अझ फलदायी र सुखमय बनाउने बताउनु भएको छ ।
प्रदेशवासीमा नयाँ वर्षको सुख शान्ति र समृद्धिको शुभकामना व्यक्त गर्दै नयाँ उत्साह थप्नका लागि नयाँ वर्षको सुरुवातदेखि नै पर्यटन वर्ष २०८२ घोषणा गरेर प्रदेशलाई स्वच्छ, सुखी र समुन्नत प्रदेश बनाउने आधारशीला तय गरिने जनाउनु भयो । उहाँले जारी गर्नुभएको शुभकामना सन्देशमा नयाँ वर्षमा नै लगानी सम्मेलन गरेर प्रदेशको सुख प्रदेशको विकास समृद्धिमा नयाँ इटा थप्ने प्रयत्नसमेत भइरहेको उल्लेख छ ।
सीमित स्रोत साधनले जनताका आकांक्षालाई भनेजस्तो पूरा गर्न नसके पनि संघीयताको यो सात वर्षमा कोशी प्रदेश सरकारले धेरै काम गरेको उल्लेख गर्दै त्यसलाई तथ्यको आधारमा प्रस्तुत गरेर अगाडि बढ्नुपर्ने अवस्था रहेको शुभकामना सन्देशमा उल्लेख छ ।
उहाँले संघीय संरचनाहरूलाई सबलीकरण गर्दै समृद्ध नेपाल सुखी नेपालीको राष्ट्रिय लक्ष्य पूरा गर्न संघीयतालाई बलियो बनाउनुपर्ने जिम्मेबारी रहेको जनाउनु भयो ।
