दमक, १ बैशाख । झापाको दमक नगरपालिका कार्यालयले नगरका सामुदायिक विद्यालयहरुमा अबको शैक्षिक शत्रबाट कक्षा ८ सम्मको पठनपाठन निःशुल्क गर्न परिपत्र गरेको छ ।
नगरपालिकाका प्रमुख प्रशासकीय अधिकृत गणेशराज कार्कीले चैत ३१ गतेको नगर कार्यपालिकाको बैठकको निर्णय अनुसार कक्षा ८ सम्मका बालबालिकालाई कुनै पनि शुल्क नलिने भन्ने निर्णय भएको जानकारीसहित परिपत्र गर्नुभएको छ ।
वर्तमान संविधानको धारा ३१ र उपधारा २ अनुरुप शिक्षा सम्बन्धि हक अन्तर्गत राज्यबाट प्रत्येक नागरिकलाई आधारभूत तहसम्मको शिक्षा अनिवार्य र निःशुल्क तथा माद्यमिक तहसम्मको शिक्षा निःशुल्क हुने व्यवस्था गरेको छ । सो नीतिलाई कार्यान्वयन गर्न २०८० चैत २४ को निर्णयअनुसार यो वर्ष ८ सम्मको शिक्षा निःशुल्क गर्ने प्रक्रिया अघि बढाउन विद्यालयहरुलाई परिपत्र गरिएको उल्लेख छ ।
गत शैक्षिक शत्र कक्षा ५ सम्म निःशुल्क गरिएको घोषणा गर्दै विद्यालयहरुलाई नगरले राहतमा सघाएको भएपनि केही विद्यालयले भनें त्यो सहयोग पूर्ण नभएको भन्दै शुल्क लिएको अवस्था थियो ।
