दमक, ४ बैशाख / नेपाली राजनीतिमा भित्रिएको विकृतिबीच कर्णालीको व्यथालाई हास्यशैलीमा प्रस्तुत चलचित्र ‘लाज शरणम्’ले प्रदर्शनको ५१ औं दिन मनाएको छ ।
५१ दिनसम्मको प्रदर्शनको यात्राका सन्दर्भमा यसका मुख्य कलाकार सीताराम कट्टेलले यात्राका सारथी, सहयात्री, शुभेच्छुक र दर्शकहरुप्रति कृतज्ञता सन्देश जारी गर्नुभएको छ ।
‘दर्शकहरुबाट चलचित्र ठिक छ भन्ने प्रतिक्रिया नआएसम्म हामीले जतिसुकै राम्रो काम गरेका छौँ भने पनि त्यो सावित हुने थिएन । यसकारण दर्शकको साथ केवल साथ मात्र होइन । दिशा निर्धारण गर्न रणनीति बनाउने आधार पनि हो । नेपाली चलचित्रको बजारलाई बचाउने अभियान पनि हो ।’ आमदर्शकबाट प्राप्त आत्मीय र भरोसायोग्य साथ सफल यात्राको मानक भएको बताउँदै उहाँले भन्नुभयो ‘दर्शकको साथबाट हाम्रो चलचित्रले प्रतिष्ठा प्राप्त गर्न सकेको छ । यसप्रति आमदर्शकप्रतिको ऋणलाई दायित्व ठानेका छौँ । यसलाई आगामी सिर्जनाको उत्कृष्टताबाट तिर्ने प्रयास गर्नेछौँ ।’
नेपाली सिनेमालाई रचनात्मक उद्योगका रुपमा विकास गर्न क्रियाशील चलचित्रका आयामसँग सम्बन्धित संघसंस्थाहरुको साथ अविस्मरणीय रहेको कट्टेलले उल्लेख गर्नुभएको छ । समाचार र समीक्षामार्फत हामीमाथि निगरानी गरिरहने आमसञ्चारकर्मीप्रति आभार समेत व्यक्त गर्नुभयो ।
चलचित्र अध्ययनको यो विश्वविद्यालयबाट आफूहरुले धेरै पाठ सिकेको र यो सिकाइमा प्रत्यक्ष अप्रत्यक्ष योगदान गर्ने सबैको गुन स्मरण गरेको उल्लेख गर्नुभएको छ ।
‘लाज शरणम्’ २०८१ फागुन १४ गतेबाट सार्वजनिक प्रदर्शनमा आएको थियो । धेरैजसो हलमा चलचित्र उत्रिएको छ भनें काठमाडौंसहितका केही स्थानमा भनें ५१ औं दिन मनाउन सफल भएको छ । ‘लाज शरणम्’ले काठमाडौं उपत्यकाका क्यूएफएक्स, आईएनआई सिनेमाज, एफक्यूब सिनेमाज, कीर्तिपुर सिनेप्लेक्स, बीएसआर मुभिज, रञ्जना सिनेप्लेक्स, विग मुभिज र मोफसलमा झापाको विर्तामोडको क्यूएफएक्स, दमकको डिम्याक्स सिनेमाज र बुटवलको आईएनआई सिनेमाजमा प्रदर्शनको ५१ औँ दिन पूरा गरेको निर्माता नवीन श्रेष्ठले जनाउनु भयो ।
पहिलो दिन एक करोड १० लाख रुपैयाँ ग्रसकलेक्सन गरेको ‘लाज शरणम्’ले हालसम्म ५ करोड रुपैयाँ ग्रसकलेक्सन गरेको निर्माता श्रेष्ठको भनाई छ ।
कर्णालीको कथाव्यथा प्रस्तुत गरेको चलचित्रमा सिताराम कट्टेल, विजय बराल, अर्जुन घिमिरे, सागर लम्साल, हरिष निरौला, महेश त्रिपाठी, अर्पण थापालगायत कलाकार मुख्य भूमिकामा रहनु भएको छ । चलचित्रलाई कुमार कट्टेलले निर्देशन गर्नुभएको हो । चलचित्रमा नवीन श्रेष्ठ निर्माता र राम नरेश शाह र सिर्जना खड्का सहनिर्माता रहनु भएको छ । सुदीप बरालले चलचित्र छायांकन गर्नुभएको हो ।
