उर्लाबारी, ४ बैशाख / उत्तरपूर्वी मोरङका पत्रकारहरुको साझा संस्था सञ्चार क्लब नेपाल उर्लाबारीको बिहीबार भवन शिलान्यास भएको छ ।
क्लबका संस्थापक अध्यक्षको अगुवाईमा भवनको शिलान्यास भएको हो । पत्रकारितामा भावी पुस्ताको सहजताका लागि वर्तमान पुस्ताको गहिरो चिन्ता र संगठित प्रयासमा यसखाले काम सुरु गर्न सकिएको संस्थापक अध्यक्ष खतिवडाले उल्लेख गर्नुभएको छ ।
सञ्चारकर्मीको विविधताबीचको एकताको प्रतिकका रुपमा २ दशकअघि स्थापित संचार क्लब रहेको उल्लेख गर्दै संस्थालाई अझ व्यवस्थित बनाएर लान सक्दा व्यवसायिक पत्रकारितामा टेवा पुग्ने समेत उहाँको धारणा छ ।
कार्यक्रममा क्लबका वर्तमान अध्यक्ष कुमार खड्कासहित पूर्व अध्यक्षहरु तथा क्लबका सदस्यहरुको उपस्थिति रहेको थियो ।
