दमक, १० बैशाख / जसरी पनि तोकिएको समय अर्थात बैशाख ११ बाट कक्षा १२ को परीक्षा गर्ने दृढता व्यक्त गरेको राष्ट्रिय परीक्षा बोर्ड त्यो दृढताबाट पछि हटेको छ । आन्दोलनमा रहेका शिक्षकहरु विद्यालय नफर्किए पनि कर्मचारीसहित अन्य संयन्त्र परिचालन गरेर भएपनि परीक्षा गरिछोड्ने भनाई एक दिन पनि टिकेन र परीक्षा बैशाख २१ गतेदेखि गर्ने भनेर हिजो दिउँसो मिति सारियो ।
आखिर शिक्षकहरु नहुँदा परीक्षा सञ्चालन गर्न नसकिने सिधासिधी तथ्यमा किन सरकारले आफ्नो घमण्ड प्रस्तुत गर्यो ? शिक्षकहरुले विद्यालय शिक्षा विधेयक पारित गरी यथासिघ्र ऐन बन्नुपर्ने मागसँग टकराव गर्न सरकारले परीक्षाको विषयलाई माध्यम बनायो । तर परीक्षा गराउन शिक्षककै आवश्यकता पर्ने कुरालाई नकार्नसक्ने अवस्था भएन ।
वैशाख ११ गतेदेखिका लागि तय भएको परीक्षा शिक्षकहरूको आन्दोलनका कारण सार्नु परेको भन्ने कुरा बोर्डले सिधा उल्लेख नगरे पनि तथ्य त्यही थियो । यसका लागि प्रधानमन्त्री केपी शर्मा ओलीसँग बोर्डका अध्यक्ष डा.महाश्रम शर्मा लगायतका अधिकारीले छलफल गरेका थिए । छलफलपछि परीक्षा १० दिन पछि सार्न बोर्ड बाध्य भयो ।
बोर्डको हिजो बिहान मात्र बसेको बैठकले परीक्षा नसार्ने निर्णय गरेको थियो तर बेलुका नै परीक्षा सार्न निर्णय सरकार निकायको फितलो अवस्था देखिएको टिप्पणी भइरहेको छ ।
बोर्डको कक्षा १२ को परीक्षा नियन्त्रक कृष्णप्रसाद शर्माले जिल्लास्थित इकाईहरू, स्थानीय तह, शिक्षक कर्मचारी लगायत परिचालन गरेर परीक्षा गरिने बताउनु भएको थियो । बिहान बैठक बसेर तोकिएकै मिति (वैशाख ११ गतेदेखि) गर्ने र त्यसका लागि सहयोग गर्न अनुरोध गरेको बोर्ड केही घण्टामै परीक्षाको मिति सार्न पुगेको हो ।
यसको पछिका थुप्रै कारण छन् । पहिलो कारण भनेको प्रधानमन्त्रीको परीक्षा सार्न अनुरोध, दोस्रो बोर्डको जसरी पनि परीक्षा गर्ने अडानपछि चौतर्फी विरोध, तेस्रो परीक्षा गरेको खण्डमा प्रतिवाद गर्ने शिक्षकहरुको चेतावनी ।
