पेन्सलभेनिया, १० बैशाख । अमेरिकाको पेन्सलभेनियास्थित मिडलटाउन सहरमा त्रिवेणी साहित्य मञ्चको आयोजनामा मासिक रचना वाचन शृङ्खला–७ अन्तर्गत एक भव्य साहित्यिक कार्यक्रम सम्पन्न भएको छ ।
कविता, गजलसहित रचनाले उपस्थित साहित्यकार र दर्शकहरूले नेपाली भाषाको सृजनात्मकता र सौन्दर्यमा भरपूर रमाएको प्रतिक्रिया दिएका छन् । यस शृङ्खलामा करिब ३० वटा रचनाहरू वाचन गरिएको थियो।
स्वर्गीय डीआर. गौतमको सम्झना गर्दै कार्यक्रमको सुरुवात गरिएको थियो । शिक्षण पेसामा चार दशक बिताएका गौतमको गत मार्च ३० मा ओहायो राज्यमा निधन भएको थियो । उहाँको स्मृतिमा मौनधारणसहित विशेष प्रस्तुति राखिएको थियो ।
विशेष अतिथिका रूपमा युवा वैज्ञानिक पूजा थापा उपस्थित हुनुहुन्थ्यो । थापाले वृद्ध अवस्थामा देखिने सामाजिक समस्याबारे अनुसन्धान गरिरहेको बताउँदै यस अभियानमा सामुदायिक सहयोगको आवश्यकता औंल्याउनु भयो ।
रचना वाचनको प्रक्रियामा यसपटक विशेष नविनता अपनाइएको थियो । मञ्चका सचिव नारद आचार्य ‘सुदामा’ले गोलाप्रथाबाट नाम छानेर रचनावाचनको व्यवस्था मिलाउनु भएको थियो । जसले कार्यक्रममा थप उत्साह ल्याएको थियो ।
कार्यक्रम त्रिवेणी साहित्य मञ्चका अध्यक्ष केशव बैरागी ‘माइलो’को अध्यक्षतामा सम्पन्न भयो । कार्यक्रममा त्रिवेणी साहित्य मञ्च ल्यान्कास्टर शाखाका ओम घिमिरे, साहित्यकार गण्डकी पुत्र, मीरा अधिकारी, विष्णु लुइँटेल, प्रकाश नौबाग, बाल प्रतिभा दिव्य घिमिरे, दीपशिखा घिमिरे, देविका बराल, खडा भण्डारी, लेखक सोम भण्डारी, नव गायिका रानी खरेल लगायतका साहित्यकार तथा साहित्यप्रेमीहरूको उल्लेख्य उपस्थिति थियो ।
करिब दुई घण्टा लामो कार्यक्रमको सञ्चालन सचिव नारद आचार्य ‘सुदामा’ले गर्नुभएको थियो । यो मासिक शृङ्खलाले अमेरिकामा बसोबास गर्ने नेपाली समुदायबीच भाषा र साहित्यको सेतु निर्माणमा योगदान पुर्याइरहेको छ ।
