पथरी, १६ बैशाख / मोरङको पथरी शनिश्चरे ९ मा रहेको महिला जागृति सामुदायिक वन उपभोक्ता समूहले उपभोक्ता सदस्यलाई उद्यमी बन्ने जागरणका लागि झोल साबुन, नुहाउने ठल्लो साबुन, फिनेल र हार्पिक सम्बन्धिको ३ दिने तालिम सञ्चालन गरेको छ ।
सहयोगी नेपाल मेचीनगर झापाको प्राविधिक सहयोगमा सञ्चालित तालिमका सहजकर्ता डीएल राजवंशीले आफूहरुले यसखाले तालिम धेरै ठाउँमा सञ्चालन गरेर उद्यमी बन्न उत्प्रेरणा भरेको जनाउनु भयो ।
वन समूह अध्यक्ष तुलसा याक्खाले महिलाहरुले घरमै बसेर घरेलु उद्योगका रुपमा थोरै लगानीबाट गर्जो टार्न सक्ने अवस्थालाई मध्यनजर गरी तालिम दिइएको उल्लेख गर्नुभयो ।
तालिममा ३५ जनाको सहभागिता रहेको छ । तालिममा सहभागिहरु उत्साहित बनेर सिकेको देखिएको छ । तालिममा सहयोगी नेपालका निर्मला (एञ्जिला) गिरी र सपना पोख्रेलले सहप्रशिक्षकको भूमिका निर्वाह गर्नुभएको थियो ।
