दमक, २२ बैशाख / महिलाहरुलाई तालिम दिएर आत्मनिर्भर बनाउने लक्ष्य राखिएको हुन्छ । तर तालिमपछि प्रशिक्षार्थीलाई आवश्यक पर्ने बीउ पुँजी, मेसिन वा उपकरणको अभावले भने ती प्रशिक्षार्थीले सिकेको सीप बालुवामा पानी हाले बराबर हुने गरेको छ । दमकमा रहेका लक्षित वर्गका महिलाहरुलाई पनि दमक नगरपालिका वडा नम्बर ६ ले निःशुल्क सिलाई बुनाईको तालिम दियो । तर तालिमले मात्रै नहुने भएपछि उनीहरुले त्यस सम्बन्धिका मेसिनहरुको समेत माग राखेका छन् ।
सिलाई बुनाईका लागि महिलाहरु सिपालु बनेर काम निकाल्न सक्छन् । सीप सिके भने घरमै बसेर पनि गरिखान सक्छन् । थोरै पैसाका लागि परिवारका अन्य सदस्यसँग भर परिरहनु नपरोस भनेर ६ नम्बर वडाले निःशुल्क सिलाई बुनाईको तालिम दियो । सुरुमा केही जानकारी नभएको अवस्थामा तालिममा सहभागी मनिसा खड्काले निःशुल्क तालिम लिएपछि अहिले कपडा काट्न, नाप्न र सिलाउन समेत जान्ने हुनु भएको छ ।
यस्तै, प्रीतिकुमारी ठाकुरले पनि सिलाई तालिम लिनु भयो । जान्नु पनि भयो र उहाँलाई विश्वास छ यो सीपको प्रयोग गरेर आर्थिक उपार्जन गर्न सक्छु भन्ने । तर त्यसका लागि मेसिन उपलब्ध गराइदिन उहाँले माग गर्नु भएको छ ।
तीन महिनाको अवधिमा १८ वटा आईटमको सिलाई कटाई सम्बन्धीको सीप सिकाएको बताउँदै तालिमकी प्रशिक्षक सरस्वती भट्टराई भन्नु हुन्छ ‘यो आधारभूत तहको मात्रै तालिम हो । उहाँहरुलाई रोजगार वा स्वरोजगारमा बन्न अझै एड्भान्स तालिमको पनि आवश्यक पर्छ र मेसिनको पनि आवश्यक पर्छ । ’
वडा नम्बर ६ का अध्यक्ष टेकबहादुर थापाले महिलाहरुलाई आत्मनिर्भर बनाउने उद्धेश्यले यसखालका तालिमहरु सञ्चालन गरिरहिएको बताउनु भयो । ‘आत्मनिर्भर बन्न र बनाउन वडाले थप के गर्नु पर्छ त्यो सबै सहयोग र सहकार्य गर्न तयार रहेको छौं । तर सीपको सदुपयोग गर्नुहोस् ।’– उहाँले भन्नुभयो ।
सीप सिकाएर यत्तिकै छोड्ने परिपाटी । सीप सिकेकाहरुलाई अव के गर्ने भन्ने प्रतिवद्धता गराउँदै सहयोग गर्ने काम नभएका कारण भने यसखाले तालिम बालुवामा पानी हाले बराबर हुने गरेका छन् । त्यसैले लगानी गर्ने संस्था, तालिम दिने निकायले निगरानी गर्दै आवश्यक मेसिनरी सामान उपलब्ध गराउने तथा तालिमका प्रशिक्षार्थीले पनि यसको भरपुर सदुपयोग गरे मात्रै परिणाममुखी बन्न सक्ने छ ।
