दमक, २४ बैशाख / झापाको कमल गाउँपालिका वडा नम्बर ७ लाई पूर्ण खोप सुनिश्चितता तथा दिगोपन वडा घोषणा गरिएको छ ।
स्थानीय स्वामित्व र सहभागिता, पूर्ण खोप सुनिश्चितता हाम्रो प्रतिबद्धता भन्ने मुल नाराका साथ वडालाई पूर्ण खोप सुनिश्चितता तथा दिगोपन वडा घोषणा गरिएको हो ।
पूर्ण खोप भन्नाले राष्ट्रिय खोप तालिकामा समावेश भएका १५ महिना उमेर भित्रमा पाउनु पर्ने सबै खोपहरु, सबै बालबालिकाहरुले पूर्ण रुपमा लिएको एवम् पछि तालिकामा अन्य खोपहरु थप भएमा सो समेत लिएको अवस्थालाई बुझाउँछ । हरेक बालबालिका जन्मेपछि स्वस्थ भएर बांँच्न खोप सेवा प्राप्त गर्नु संविधानतः नैसर्गिक अधिकार हो । सोही अनुरुप कमल ७ ले पनि महिला स्वास्थ्य स्वयसेबिकालाई घर घरमा पठाएर तथ्याङ्क संकलन गरि खोप लगाइएको कमल ७ की महिला स्वास्थ्य स्वयमसेविका बिष्णुकुमारी श्रेष्ठ बताउनुहुन्छ ।
वडामा जन्मेदेखि १५ महिना भित्रका बालबालिकाले यो वर्ष पाउनु पर्ने सवै खोप प्राप्त गरेको आधारभूत स्वास्थ्य चौकी स्वास्थ्य सेवा केन्द्र कमल ७ का प्रमुख अमृत सुब्बाले बताउनुभयो । उहाँले प्रत्येक घर घरमा पुगेर तथ्याङ्क संकलन गरि ७ नम्बर वडामा खोप लगाउनुे सबै बालबालिकालाई पूर्ण रुपमा खोप लगाएको जानकारी दिनुभयो ।
सम्पूर्णले तदारुकता देखाएकै कारण वडा नम्बर ७ लाई पूर्ण खोप सुनिश्चितता तथा दिगोपन वडा घोषणा गर्न सफल भएकोमा कार्यपालिका सदस्य मनमाया सिटौलाले खुसी ब्यक्त गर्नुभयो ।
वडाध्यक्ष पृथ्वीपति राईका अनुसार पछिल्लो समयमा वडाले स्वास्थ्य क्षेत्रमा ठूलो फड्को मारिरहेको छ । बिगतमा स्वास्थ्य सेवा लिन निक्कै सकस पर्नेमात्रै होइन, पालिका भन्दा बाहिर जानुपर्ने स्थितिको समेत अहिले आएर अन्त्य भएको उहाँ बताउनुहुन्छ ।
वडाबाट सुरु भएको यो अभियानले पालिकालाईनै पूर्ण खोप सुनिश्चितता तथा दिगोपन वडा घोषणा गर्न मद्धत पुग्ने अपेक्षा गरिएको छ ।
