अमेरिका, २४ बैशाख / नेपाली भाषा, कला र संस्कृति विश्वभर फैलिनु नेपाली समुदायका लागि पहिचानको स्रोत बनेको छ । यिनै मूल्यहरूलाई प्रवद्र्धन गर्न इन्ट्रा नेशनल वेयफेयर एण्ड सपोर्ट फाउण्डेशन अफ अमेरिकाले सुरु गरेका दुई अन्तर्राष्ट्रिय स्तरका रियालिटी शो—‘मेरो भ्वाइस् युनिभर्स’ र ‘मेरो डान्स युनिभर्स–२’ ले नेपाली स्रष्टाहरूलाई एउटै मञ्चमा जोड्ने उद्देश्य लिएको छ ।
यस महान अभियानप्रति अन्तर्राष्ट्रिय नेपाली गीतकार संघ (आइएनएलए) ले खुलेर समर्थन जनाउँदै एक प्रेस विज्ञप्ति जारी गरेको छ । सो विज्ञप्तिमा यी कार्यक्रमहरू नेपाली भाषिक र सांस्कृतिक एकताको सूत्र बन्ने विश्वास व्यक्त गरिएको छ ।
आइएनएलएको विज्ञप्ति अनुसार, यी कार्यक्रमहरूले विश्वभर छरिएर रहेका नेपाली गीत, संगीत, भाषा र साहित्यका सर्जकहरूलाई जोड्न सफल हुने विश्वास गरिएको छ । यसले नेपाली कलालाई विश्वव्यापी रूपमा चिनाउन सहयोग पुर्याउनेछ । नेपाली स्रष्टाहरूको मौलिकता र सिर्जनशीलतालाई विश्व मञ्चमा प्रस्तुत गर्ने यो अभियानप्रति संघले आफ्नो नैतिक समर्थनका साथै भविष्यमा सहकार्यको प्रतिवद्धता पनि जनाएको छ ।
आइएनएलएले विगतदेखि नै नेपाली भाषा, साहित्य र संगीतको प्रवद्र्धनमा भूमिका खेल्दै आएको छ। सोही परम्परा अनुरूप संघले यस्ता अन्तर्राष्ट्रिय कार्यक्रमहरूमा ऐक्यबद्धता जनाउँदै आफू सधैं सँगै रहने उल्लेख गरेको छ ।
प्रेस विज्ञप्तिमा उल्लेख गरिएअनुसार, ‘मेरो भ्वईस् युनिभर्स’ र ‘मेरो डान्स युनिभर्स २’ को उद्देश्य केवल मनोरञ्जन मात्र नभई, नेपाली संस्कृति, भाषा र कलाको सम्मानसहित विश्वव्यापी पहुँच विस्तार गर्नु हो । यस किसिमका कार्यक्रमले नेपाली सन्तानमा भाषा र संस्कृतिप्रति गर्वको भावना जागृत गर्नेछन् ।
आइएनएलएका अध्यक्ष हरि उप्रेती, उपाध्यक्ष शेखर ढुंगेल र महासचिव रन खड्काले हस्ताक्षर गरेको विज्ञप्तिमा, फाउण्डेशनलाई कार्यक्रमको आयोजनाको लागि हार्दिक बधाई दिँदै सफलताको शुभकामना पनि व्यक्त गरिएको छ ।
नेपाली सांस्कृतिक धरोहरलाई प्रवद्र्धन गर्ने दिशामा उन्मुख यी दुई रियालिटी शोहरू नेपाली स्रष्टा, भाषा र समाजलाई अझ सशक्त बनाउनेतर्फ एक ऐतिहासिक पाइला सावित हुने आइएनएलएको बुझाइ छ ।
