दमक, २८ बैशाख / उत्तरपूर्वी मोरङको पथरी शनिश्चरे ९ रिंगुवामा अवस्थित ऐतिहासिक विद्यालय ‘सिंहवाहिनी मावि’को प्रवर्द्धनका लागि काठमाठौंमा रहेका भूतपूर्व विद्यार्थीहरुबीच छलफल भएको छ ।
सो विद्यालयका भूतपूर्व विद्यार्थीहरुको संस्था ‘सिंहवाहिनी मावि भूतपूर्व विद्यार्थी सञ्जाल’को आयोजनामा काठमाडौंस्थित सम्पर्क समितिसँग छलफल भएको हो । सञ्जालका अध्यक्ष राजकुमार राईको उपस्थितिमा काठमाडौं सम्पर्क समिति संयोजक गोपाल कार्कीका साथै सदस्यहरु रमेश घिमिरे, मञ्जु अधिकारी, प्रेमकुमार राईसहितको उपस्थितिमा छलफल गरी विद्यालयमा अक्षयकोष स्थापना लगायतका विषयमा योजना अघि बढाउने निर्णय भएको छ ।
काठमाडौंमा रहेका सिंहवाहिनी माविका भूतपूर्व विद्यार्थीहरुको थप खोजी गरी सञ्जालमा जोड्ने र सृजनात्मक गतिविधि अघि बढाउने सल्लाह भएको सञ्जाल अध्यक्ष राईले जानकारी गराउनु भयो ।
सञ्जालले अभियान सञ्चालन गरी आर्थिक स्रोत जुटाएर विद्यालयमा खानेपानीको व्यवस्थापन र विद्यालय रंगरोगन कार्य सम्पन्न गरेको छ । अक्षयकोष निर्माण गरी विद्यार्थीको पठन पाठनमा सघाउने अबको योजना रहेको अध्यक्ष राईले उल्लेख गर्नुभयो । सञ्जालले विभिन्न देशमा प्रवास सम्पर्क समिति समेत निर्माण गरेको छ ।
