दमक, २८ बैशाख / चैत १५ गते राजावादीहरुको हिंसात्मक प्रदर्शनको आरोपमा शिव सेना नेपालका अध्यक्ष अनिल बस्नेतलाई प्रहरीले पक्राउ गरेको छ ।
गत चैत १५ गतेको तीनकुने घटनाको अनुसन्धानका क्रममा बस्नेतलाई पक्राउ गरिएको जिल्ला प्रहरी परिसर काठमाडौंका प्रवक्ता एसपी अपिलराज बोहराले जनाउनु भयो । फरार अवस्थाका बस्नेतलाई आज सुकेधारा क्षेत्रबाट पक्राउ गरिएपछि म्याद थपका लागि अदालत लगिएको छ ।
व्यवसायी दुर्गा प्रसाईंको अगुवाइमा भएको तीनकुनेको प्रदर्शनका क्रममा एक सञ्चारकर्मीसहित २ जनाको मृत्यु भएको थियो । साथै दर्जनौँ गाडीमा आगजनी र व्यक्तिगत तथा सरकारी सम्पत्तिमा समेत आगजनी भएको थियो । प्रहरीले प्रसाईंसहितलाई पक्राउ गरी मुद्धा चलाएको छ ।
