दमक, ५ जेठ । अहिले विवाहको लगन चलेकाे छ । मौसमको फेरबदलसँगै सुनको मूल्यले पनि रेर्कड तोड्ने गर्छ । यति बेला बिहे खर्च महङ्गो भएको अवस्थामा सुन समेत महंगिदा अझ समस्या थपिएको छ ।
जेठ महिनामा विवाहको लगन पनि बढी नै हुन्छ । बढी लगन भयो भने सुनको बढी कारोबार होला भनेर सुनचाँदी व्यवसायी खुसी हुनु स्वाभाविक नै हो । तर, यस वर्ष ठीक उल्टो भएको छ । सुनको भाउ बढेसंगै अन्य वर्ष जस्तो सुनचाँदी व्यवसायीहरुको अनुहारमा चमक देखिदैन । सुनको भाउ उकालो लाग्दा विवाह खर्च महङ्गिएको छ । विवाह खर्च महङ्गिदाँ सुनचाँदी पसलमा उपभोक्ताको संख्या न्युन देखिदा व्यापारमै समस्या भएको दमकस्थित मनकामना ज्वेलरीकी सञ्चालक अस्मिता जगमेरको दुखेसो छ । ‘भाउ त बढ्यो नि, तर ग्राहकले सुन किन्नै नसक्दा हामीले कसरी बेच्नु र ? समस्या छ ।’–उहाँले समस्या दर्शाउनु भयो ।
अन्तर्राष्ट्रिय बजारमा सुनको भाउ बढ्दा नेपालमा पनि भाउ बढ्छ । यो बेला छापावाल सुन प्रतितोला १ लाख ८५ हजार रुपैयाँसम्म पुगेको छ । सुनको भाउ उकालो लाग्दा सोचे अनुसारको कारोबार भएको छैन । जसले सुनचाँदी व्यवसायीमा निराशा छाएको दमकका अर्का सुनचाँदी व्यवसायी अजित कुमार शंकरले समेत समस्या दर्शाउनु भयो । सुनको भाउ बढेकालेनै ब्यापार घटेको गुनासो गर्नुहुन्छ ।
जेठ महिनामा जम्मा ८ दिन विवाहको लगन छ । लगन धेरै भएपनि सुनको भाउ उकालो लाग्दा कारोबारमा सन्नाटा छाएपछि के गर्ने कसो गर्ने भएको छ दमकस्थित रत्न ज्वेलरीका सञ्चालक रत्न गजमेरलाई ।
बाहिरबाट हेर्दा धेरै व्यापार भएको र धेरै कमाएको देखिए पनि भित्री अवस्था त्यस्तो नरहेको दमकका अर्का सुनचाँदी व्यवसायी किरण गजमेर भन्नुहुन्छ ‘मानिसको क्रयशक्ति कमजोर भएकाले विहेको आवश्यकता बनेको भएपनि सुन किन्न समस्या छ । हाम्रो व्यवसाय चौपट हुने भयो ।’
बजारमा सुन पसलमा उपभोक्ताहरुको चहल पहल देखिदैन । कतिपय व्यवसायीले त तीन चार दिनसम्म बोहनी समेत नगरेको दुखेसो गर्छन् ।
