धरान । इटहरीस्थित पाथीभरा एड्भरटाइजिङ प्रा.लि. आठौं वर्षमा र पाथीभरा जब लिङ्क तेस्रो वर्षमा प्रवेश गरेको अवसरमा क्याम्पस र विद्यालयलाई स्यानिटरी प्याड राख्ने भेन्डिङ मेसिन प्रदान गरिएको छ ।
इटहरीका जनता बहुमुखी क्याम्पस र महेन्द्र माध्यमिक विद्यालयमा भेन्डिङ मेसिन र स्यानिटरी प्याड हस्तान्तरण गरिएको कम्पनीका प्रबन्ध निर्देशक पवन अधिकारीले जानकारी दिए । विद्यार्थीहरू महिनावारी भएका बेला समस्या नहोस् भनेर भेन्डिङ मेसिन हस्तान्तरण गरिएको उनले बताए ।
मेसिन तथा स्यानिटरी प्याड हस्तान्तरण कार्यक्रममा बोल्दै जनता बहुमुखी क्याम्पसकी प्रमुख प्रा.डा. गीता अधिकारीले भेन्डिङ मेसिनले क्याम्पसलाई फाइदा पुगेको बताइन् । उनले महिनावारी भएकै कारण क्याम्पसमा किशोरीहरूले पढाइ छाड्नुपर्ने बाध्यता अब हटेको बताइन् ।
‘यो मेसिनले ठूलो राहत पुगेको छ, अब क्याम्पसमा अध्ययनरत छात्राहरूलाई निकै सहज हुनेछ’–उनले भनिन् । जनता बहुमुखी क्याम्पसमा अध्ययनरत छात्रा अप्सरा कार्कीले आफूहरू महिनावारी भएको समयमा क्याम्पस नै आउन कठिन हुने गरेकोमा अब त्यस्तो बाध्यता हटेको बताइन् ।
यसैगरी महेन्द्र माध्यमिक विद्यालयका व्यवस्थापन समिति अध्यक्ष टङ्क पौडेलले पाथीभराले विद्यार्थीको हितमा काम गर्दा आफूहरू लाभान्वित भएको बताए । पाथीभरा जब लिङ्कले बेरोजगारी युवाहरूलाई रोजगारी प्रदान गर्दै आएको छ । यस्तै पाथीभरा एड्भरटाइजिङले प्रदेश १ मा रहेर स्थानीय एवम् राष्ट्रिय रूपमा विज्ञापनका क्षेत्रमा काम गर्दै आएको छ ।
