झापा,७ असार | झापाको कमल गाउँपालिका–५ स्थित रतुवा पुलमा गएराति ट्रक र मोटरसाइकल एकआपसमा ठोक्किँदा एक युवकको ज्यान गएको छ। दुर्घटना असार ६ गते अर्थात हिजो राति करिब ९:३० बजे भएको जिल्ला प्रहरी कार्यालय झापाले जनाएको छ।
मे १ ख ३३१८ नम्बरको ट्रकले सोही दिशाबाट गइरहेको मे ९ प ८९०४ नम्बरको मोटरसाइकललाई ठक्कर दिँदा मोटरसाइकल चालक कमल गाउँपालिका–५ का ३० वर्षीय सुशील राई गम्भीर घाइते भएका थिए। उनलाई तत्कालै उपचारका लागि निम्स अस्पताल दमकमा पुर्याइएको थियो। प्रारम्भिक उपचारपछि थप उपचारका लागि बिर्तामोडस्थित बीएनसी अस्पताल रिफर गरिएको थियो।
तर, बीएनसी लैजाने क्रममा दमक नगरपालिका–६ गणतन्त्र चोक नजिकै पुगेपछि राईको स्वास्थ्य अवस्था झन् गम्भीर बनेको बताइएको छ। आफन्तहरूले शंका जनाएपछि उनलाई पुनः निम्स अस्पताल फर्काइएको थियो, जहाँ डाक्टरले राति ९:५५ बजे मृत घोषणा गरे।
दुर्घटनामा संलग्न ट्रक र चालक झापा अर्जुनधारा नगरपालिका–७ निवासी ५३ वर्षीय रघुनाथ सिटौलालाई प्रहरीले नियन्त्रणमा लिएको छ। ट्रकसमेत नियन्त्रणमा लिइएको र घटनाको थप अनुसन्धान भइरहेको प्रहरीले जनाएको छ।
प्रहरीले घटनाबारे थप अनुसन्धान गरिरहेको छ भने मृतकको शव अहिले दमकस्थित अस्पतालमा राखिएको छ।
