दमक, २१ असार । दमक नगरपालिकाको उत्तरी क्षेत्रमा रहेको त्रिवेणी टोलमा छ , त्रिवेणी खेलमैदान । यहाँ वडा तथा नगर स्तरका बिभिन्न खाले खेलकुदका प्रतियोगिता हुन सक्छन । तर यहाँ कार्यक्रम गर्न व्यवस्थित स्टेज थिएन । यही कुराको मध्यनजर गर्दै वडाका जनप्रतिनिधिको सकृयता र पहलमा स्टेज निर्माण भएको छ । यसले यहाँका खेलाडीहरुलाई सहज बनाउने विश्वास गरिएको छ ।
बालबालिका तथा युवा जमातलेनै किन नहोस । यस क्षेत्रमा विद्यालय स्तरीय, वा कुनैपनि तहको खेलकुद सम्बन्धिको प्रतियोगिता गर्न यहाँ फराकिलो खेलमैदान छ । चारैकुना मिलेको खेलमैदान भएपनि यसको प्रयोग उति भएन । यहाँका खेलप्रेमीहरु यहाँ भन्दा निकै तल रहेको प्रस्तावित मदन भण्डारी रङ्गशाला जान बाध्य भए । सो बाध्यतालाई हटाउन जनप्रतिधिले कोशी प्रदेश सरकारसँग यस खेल मैदानको व्यवस्थापनमा योजना पेस गरे । यो क्षेत्रका प्रदेश सांसद तथा कोशी प्रदेश सरकारको प्राकृतिक श्रोत तथा पूर्वाधार समितिका सभापति समेत रहनु भएका होम बहादुर थापा मार्फत प्रस्तावलाई अघि बढाइयो । अहिले पहिलो चरणम यहाँ आवश्यकीय मञ्च निर्माण गरिएको छ । यसले खेल प्रेमीहरुले प्रतियोगिता सञ्चालन गर्दा कार्यक्रम गर्न सहज हुने विश्वास गर्नुहुन्छ यस वडाका अध्यक्ष नवीन बराल ।
पहिलो चरणमा ५ लाख रुपैँया बजेट आएको र त्यसबाट यसको स्तरोन्नतिको काम सुरूवात भएको उहाँले बताउनु भएको छ । यहाँ आवश्यक पर्ने अन्य संरचना बिस्तारै बनाउँदै जाने गरी योजना बनाइरहिएको बताइएको छ ।
