दमक , २२ असार । त्रिभुवन विश्वविद्यालयमा विभिन्न समूहले लगाएको ताला खुलेको छ। सर्वोच्च अदालतको आदेशपछि विभिन्न समूहको नाममा लगाएको ताला सम्बन्धी समूहले नै खोलेका हुन् । फास्ट ट्याक मार्फत प्रोफेसर नियुक्तिको विरोध, विद्यार्थी भर्ना खोल्नुपर्ने लगायतका मागहरू राखेर आंशिक प्राध्यापक, नेविसंघ र अखिल क्रान्तिकारीले छुट्टाछुट्टै रूपमा ताला लगाएका थिए ।
उपकुलपति कार्यालय, रेक्टर, रजिस्ट्रार कार्यालय तथा त्रिवि सेवा आयोगको कार्यालयमा ताला लगाएका थिए । सर्वोच्चले तत्काल ताला खोल्नु र खोलाउन वा नलगाउनु भन्ने आदेश जारी गरेको थियो। सोही अनुसार आंशिक प्राध्यापक सङ्घर्ष समितिले तालाबन्दी खोलेको थियो।
त्यसपछि नेविसंघले समेत तालाबन्दी खोलेको थियो भने आज अखिल क्रान्तिकारीले ताला खोलेको हो । ताला खोलेसँगै क्रान्तिकारीले उपकुलपतिसहितका तीन जना पदाधिकारीलाई विश्वविद्यालयमा प्रवेश निषेध गरेको छ।
