दमक , २३ असार । नेपाल चिकित्सक संघको आह्वानमा सोमबार देशभरका अस्पताल तथा स्वास्थ्य संस्थामा आकस्मिक बाहेकका सम्पूर्ण सेवा बन्द भएको छ। उपचारमा लापरबाही गर्ने चिकित्सक र अस्पतालहरूलाई उपभोक्ता अदालतले क्षतिपूर्ति तिराउन थालेपछि रुष्ट भएका चिकित्सकहरुले आन्दोलन गरेका हुन्।
चिकित्सक आन्दोलनको कारण काठमाडौँका ठूला सरकारी अस्पतालहरुमा पनि सोमबार आकस्मिक बाहेकका सेवा ठप्प छ। ललितपुरको पाटन अस्पताल, काठमाडौँको वीर, टिचिङसहितका अस्पतालमा पनि सोमबार आकस्मिक बाहेकका बिरामीले उपचार सेवा पाएका छैनन्।
चिकित्सकले उपचार सेवा बहिष्कार गर्दा बिरामी मर्कामा परेका छन्। नेपाल चिकित्सक संघको आह्वानमा भएको यो आन्दोलनमा चिकित्सकका अन्य नौवटा स्वास्थ्य संस्थाले पनि एक्यवद्धता जनाएका छन्।
