दमक, २४ असार । दमकमा सामाजिक उत्तरदायित्व बहन गर्दै आएको रोटरी क्लब अफ दमकले आफ्नो १४औं पदस्थापन समारोह सम्पन्न गरेको छ । रोटा वर्ष २०२५–०२६ का लागि क्लबको नेतृत्व दमकका युवा उद्यमी केशवकुमार अग्रवालले ग्रहण गर्नुभएको छ ।
सोमबार साँझ दमकमा आयोजित समारोहका बीच डिस्ट्रिक गभर्नर विनोद कोइरालाबाट पद तथा गोपनियताको शपथ लिँदै अध्यक्ष बन्नुभएका अग्रवालले क्लबको साख र मूल्य–मान्यतालाई अझ मजबुत बनाउने प्रतिबद्धता जनाउनुभयो । उहाँले आफ्ना हजुरबुबाको स्मृतिमा हरेक वर्ष सामाजिक कार्यका लागि २५ हजार रुपैयाँ योगदान दिने घोषणा पनि गर्नुभयो।
नवनियुक्त अध्यक्ष अग्रवालले सोही समारोहमा क्लब बोर्ड सदस्यहरुलाई पनि पद तथा गोपनियताको शपथ ग्रहण गराउनुभयो। कार्यक्रममा क्लबका निवर्तमान अध्यक्ष विक्रमकुमार साहले आफ्नो कार्यकालमा सम्पन्न सामाजिक क्रियाकलापहरूको संक्षिप्त विवरण प्रस्तुत गर्दै सहयोगीहरूलाई मायाको चिनो प्रदान गर्नुभयो।
क्लबका नोमिनेट प्रेसिडेन्ट सागर श्रेष्ठले स्वागत मन्तव्य राख्नुभएको कार्यक्रममा दमक नगरपालिकाका प्रमुख रामकुमार थापा, उपप्रमुख रेगिना भट्टराई, विभिन्न वडाध्यक्षहरु, रोटरीका प्रतिनिधिहरुको उल्लेखनीय उपस्थिति रहेको थियो।
