पाँचथर — मध्यपहाडी लोकमार्ग अन्तर्गत पाँचथरको याङवरक खण्डमा कार्यरत एकजना मजदुरको सुतेकै ठाउँमा मृत्यु भएको छ ।
मृत्यु हुनेमा जाजरकोट जिल्लाको नलघाट ३ घर भएका ४९ वर्षीय मानबहादुर थापा छन् । बुधबार साँझ खाना खाएर ११ बजे याङवरक १ च्याङथापुमा रहेको फिल्डमा टाँगिएको त्रिपालमुनि सुतेका उनलाई सहकर्मीहरूले मध्यराति मृत अवस्थामा भेटेका थिए ।
सँगै खाना खाएका सहकर्मी लाखापाखा लागेपछि सुत्न भनेर गएका उनलाई नाकबाट रगत बगेको अवस्थामा मृत भेटिएको भन्दै स्थानीयले प्रहरीलाई खबर गरेका थिए ।
जानकारी पाएलगत्तै घटनास्थलमा पुगेको प्रहरी टोलीले बिहीबार बिहान घटनास्थलको प्रकृति मुचुल्का उठाई पाँचथर अस्पतालमा पोष्टमार्टम गरेपछि जाजरकोट पठाएको जिल्ला प्रहरी कार्यालय पाँचथरले जनाएको छ ।
स्थानीयले उनको उच्च रक्तचाप र चिसोका कारण निधन भएको हुनसक्ने आकलन गरेका थिए । यद्यपि घटनाको अनुसन्धान सुरु गरिएको जिल्ला प्रहरी कार्यालय पाँचथरका सूचना अधिकारी डम्बर विश्वकर्माले जानकारी दिए ।
