दमक ,२५ असार। कृषि तथा पशुपक्षी विकास मन्त्री रामनाथ अधिकारीले मलको मूल्य बढाउन प्रस्ताव गर्नु भएको छ । बुधवार प्रतिनिधिसभामा कृषि मन्त्रालयका सम्बन्धमा सांसदहरूले उठाएका प्रश्नको जवाफ दिँदै उहाँले यस्तो प्रस्ताव गर्नु भएको हो । मन्त्री अधिकारीले यसका लागि सघाउन सांसदहरूलाई आग्रह समेत गर्नु भएको छ ।
हाल नेपालमा अनुदानमा बिक्री हुँदै आएको रासायनिक मलमा औसत ६६ प्रतिशत अनुदान रहेको छ । मन्त्री अधिकारीका अनुसार अहिले युरिया, डीएपी र पोटास समेत गरी सो बराबरको अनुदान दिने गरिएको हो ।
अहिले युरिया मल किन्न सरकारलाई प्रतिकिलो ८२ रुपैयाँ रहेको छ, उक्त मल १४ रुपैयाँ प्रतिकिलोमा बिक्री हुँदै आएको छ । त्यस्तै, डीएपीको मूल्य १२१ रुपैयाँ रहेकोमा ४३ रुपैयाँमा बिक्री हुँदै आएको छ ।
पोटासको लागत प्रतिकिलो ६४ रुपैयाँ रहने गरेकोमा ३१ रुपैयाँमा बिक्री हुँदै आएको मन्त्री अधिकारीले जानकारी दिनु भयो । यस अनुसार सरकारले युरियामा ५८ रुपैयाँ, डीएपीमा ७८ रुपैयाँ र पोटासमा ३३ रुपैयाँ बराबरको अनुदान दिँदै आएको छ । सरकारले मल खरिदका लागि छुट्टाएको २७ अर्ब ३६ करोड रुपैयाँबाट सो बराबरको अनुदानका लागि पुग्ने मल बिक्री वितरण भइरहेको उहाँको भनाइ छ ।
यो वर्ष मात्रै सरकारले ३ लाख ८२ हजार मेट्रिकटन आयात गर्दै ४ लाख २४ हजार रुपैयाँ बिक्री गरेको मन्त्रालयले जनाएको छ । त्यसबाहेक ५२ हजार मेट्रिकटन युरिया र ३० हजार मेट्रिकटन डीएपी कोलकत्ता बन्दरगाहमा रहेको उल्लेख गरिएको छ ।
नेपालमा अहिले ९१ हजार मेट्रिकटन मल नेपामा मौज्दात रहेको दैनिक २० हजार क्विन्टल मल वितरण हुँदै गरेको उहाँले जानकारी दिनु भयो ।
