दमक| २८ असार | प्रधानमन्त्री तथा नेकपा एमाले अध्यक्ष केपी शर्मा ओली आज झापा आउँदै हुनुहुन्छ ।
शनिबार र आइतबार दुई दिनका बिभिन्न कार्यक्रममा सहभागी हुन उहाँ झापा आउन लाग्नु भएको नेकपा एमाले झापाले जनाएको छ ।
आज ११ बजे चन्द्रगढी विमानस्थलहुँदै झापा आउन लाग्नु भएका प्रधानमन्त्री ओलीले ११ः३० बजे बुद्धशान्ति गाउँपालिका वडा नम्बर ३ स्थित भागिरथा न्यौपाने अस्पताल उद्घाटन गर्ने कार्यक्रम रहेको छ । यो सकिएपछि छेउमै रहेको इलामको माइ नगरपालिका वडा नम्बर २ स्थित नगर अस्पताल उद्घाटन गर्ने, साथै त्यहाँ रहेका भूमिहीन सुकुम्बासीहरुलाई धनीपुर्जा वितरण गर्ने र खानेपानी आयोजनाको शिलन्यास गर्ने कार्यक्रम रहेको नेकपा एमाले झापाका सचिव तुलसी कार्कीले जानकारी दिनुभयो ।
आज नै प्रधानमन्त्री ओलीले झापाको कनकाई नगरपालिकामा पनि सुकुम्बासी तथा भूमिहीनहरुलाई जग्गाधनीपुर्जा वितरण गर्ने कार्यक्रम रहेको छ । र कनकाई उद्योग वाणिज्य संघको भवन उद्घाटन गर्ने समेत कार्यतालिका रहेको छ । शनिबार बेलुका सबै कार्यक्रम सकेर दमकस्थित आफ्नै आवासमा बस्नु हुने छ । त्यहाँ पार्टीका नेता तथा कार्यकर्ताहरुसंग उहाँले भेटघाट समेत गर्ने कार्यक्रम रहेको छ । तर यो भेटघाट उहाँको व्यक्तिगत हुने छ ।
आइतबार आफ्नो निर्वाचन क्षेत्रमा
आइतबार बिहान १० बजे उहाँको गृह नगर तथा निर्वाचन क्षेत्रमा पर्ने दमक नगरपालिकामा एउटा सडक उद्धघाटन गर्नु हुने छ । नगरपालिकाद्वारा आयोजित कृष्ण मन्दिरबाट उत्तरपट्टिको मदनडाँगी तारावारी डिपो सडकको उद्घाटन गर्ने कार्यक्रम रहेको छ । नगरपालिकाले जनाएको छ ।
यस्तै उहाँकै निर्वाचन क्षेत्रमा पर्ने हुलाकी सडकस्थित गौरीगञ्ज पश्चिम रतुवा पुलको उद्घाटन गर्ने कार्यक्रम रहेको छ । यो कार्यक्रम बिहान ११ः ३० मा हुने एमाले झापाले जारी गरेको समयतालिकामा उल्लेख गरिएको छ ।
दिउँसो कार्यकर्ताको भेलालाई संवोधन
दिउँसो १२ः३० बजे बिर्तामोडको कार्यकर्ता भेलामा सहभागी हुने उहाँको कार्यतालिका रहेको छ । बिर्तामोडको सिटीसेन्टरमा आयोजित कार्यकर्ता भेलामा उहाँ २ बजेसम्म बस्नु हुने छ र आफ्नो सम्बोधन सकेर ३ः३० बजे काठमाडौं फर्कने तालिका रहेको छ ।
