दमक, ४ साउन । साउन ४ गते बिहान ७ बजे पछिको समय । हातमा विरुवा, कुटो र कुदालो बोकेर रतुवा नदीको किनारमा पुगे । यो समयमा सिम सिम पानी परिरहेको थियो । यद्यपि कोहीले बिरुवा ल्याएका थिए भनें कोही विरुवा रोप्नका लागि खाडल खनिरहेका थिए । अनि कोही चाँहि ठाउँको व्यवस्थापन गरिरहेका थिए ।
झापाको दमकमा रहेका होलसेल व्यवसायीहरुले दमक ७ स्थित रतुवा नदी किनारमा पुगेर गरेको वृक्षरोपणको दृष्य हो यो । सस्था स्थापनाको पाँचौ वार्षिक उत्सवको अवसर पारेर वृक्षरोपण आयोजना गरिएको हो ।
सामुहिक रुपमा गरिएको वृक्षरोपण दमकमा सक्रिय रहेको होलसेल व्यवसायीले १२० वटा विभिन्न प्रजातिका फलफूल, शीरिष तथा अन्य विरुवाहरु रोपे । संघका अध्यक्ष राम रिमालले दमकलाई हरित नगर बनाउन आफुहरुको पनि केही योगदान होस् भन्न यसखाले वृक्षरोपण गरिएको जानकारी दिनुभयो ।
विरुवा रोप्नु अहिले फेसन जस्तै बनेको छ । तर यसको संरक्षण नहुँदा रोपिएका बिरुवा केही दिनमै मर्ने गरेका छन् । किनकि, त्यसलाई आवश्यक पर्ने गोडमेल, मलजल तथा संरक्षणका अभावले ती विरुवा नहुर्केका उदाहरण कयांै छन् । तर होलसेल व्यवसायी संघले रोपेका सबै बिरुवा जगाउने गरी यसको संरक्षण , गोडमेलका काम समेत निरन्तर गरिने संघकी उपसचिव मैयादेवी आचार्य बताउनु हुन्छ ।
दमकस्थित रेडक्रसदेखि पूर्वतर्फ रतुवाको किनारमा अहिले स्थायी तटबन्ध निर्माण गरिएको छ । रतुवाको पाता कसेर बनाइएको यो तटबन्धको डिललाई हरियाली र थप मजबुत समेत बनाउन यहाँ वृक्षरोपण गरिएको होलसेल व्यवसायी संघले जनाएको छ ।
