काठमाडौँ, १८ साउन / नेपाली नागरिकलाई नक्कली भुटानी शरणार्थी बनाएर अमेरिका पठाउने मुद्दाका साक्षीसँग बकपत्रको क्रम अघि बढेको छ ।
काठमाडौँ जिल्ला अदालतका न्यायाधीश डा. दिवाकर भट्टको इजलासमा आजबाट साक्षीको बकपत्रका लागि पेसी तोकिएको अदालतले जनाएको छ । साक्षीसँग बकपत्रपछि मुद्दाको अन्तिम सुनुवाइमा लाने अदालतको तयारी छ । दुई वर्षपछि अदालतले यसको सुनुवाइलाई निरन्तरता दिन लागेको हो ।
गृहमन्त्री र गृह सचिवस्तरमा निर्णय गरेर बिचौलियासँगको ‘सेटिङ’ मिलाई नक्कली शरणार्थी सूची बनाएको पोल खुलेपछि प्रहरीले १२ चैत २०७९ मा केशवप्रसाद दुलालसहित केहीलाई पक्राउ गरेर अनुसन्धान अघि बढाएको थियो ।
नक्कली भुटानी शरणार्थी प्रकरणमा पूर्वउपप्रधानमन्त्री एवं एमाले नेता टोपबहादुर रायमाझी, पूर्वगृहमन्त्री एवं कांग्रेस नेता बालकृष्ण खाण, पूर्वगृह सचिव टेकनारायण पाण्डे, संविधानसभा सदस्य तथा कांग्रेस नेता आङटावा शेर्पा, पूर्वगृहमन्त्री रामबहादुर थापाका सुरक्षा सल्लाहकार इन्द्रजित राई, सन्दिप रायमाझी, टंककुमार गुरुङ, मोहनराज राई, निरन्जन कुमार खरेल, केशव तुलाधर, हरिभक्त महर्जन, राजेश अर्याल, विनिता सावदेन लिम्बु, आशिष बुढाथोकी, मोरङको पथरी शनिश्चरेका केशवप्रसाद दुलाल, सोही नगरको शिविर रहेको क्षेत्र वडा नम्बर १० का पूर्व वडाध्यक्ष सागर राई, दिपा हुमागाईं, शमशेर मियाँ, राम शरण के.सी, सुनिल बुढाथोकी, लक्ष्मी महर्जन, निरज राई, सानु भण्डारी, नरेन्द्र के.सी, सन्देश शर्मा, अशोक पोखरेल, गोविन्द कुमार चौधरी, धिरेन राई, प्रतिक थापा, टेकनाथ रिजाल विरुद्ध मुद्दा दायर गरिएको छ ।
नक्कली भुटानी शरणार्थी प्रकरणमा जिल्ला सरकारी वकिल कार्यालय काठमाडौँले ठगी, किर्ते, संगठित अपराध र राज्यविरुद्धको अपराधको कसुरमा ३० जनाविरुद्ध २०८० जेठ १० मा मुद्दा दायर गरेको थियो । यो मुद्दामा थुनछेक आदेश भएयता ३२ पटक पेसी चढेकामा गत वैशाख १ गते यता मात्रै २२ पटक पेसी तोकिएको छ ।
२०८१ बैशाख ९ मा दावाफुरी शेर्पाले दिएको जाहेरी बमोजिम सुजाता कोइराला परराष्ट्रमन्त्री हुँदाका स्वकीय सचिव केशव दुलालसहित ५ जनाविरुद्ध पूरक मुद्दा दायर गरिएको थियो । शरणार्थी प्रकरणकै संदिग्ध पात्र बेचन झालाई भारतबाट पक्राउ गरी ल्याएर २०८१ साउन २९ मा अर्को मुद्दा लगिएको थियो । अदालतले पछिल्ला दुईवटै मुद्दालाई मूल मुद्दासँगै लगाउमा राखेर सुनुवाइ अघि बढाएको छ ।
नक्कली भुटानी शरणार्थी बनाएर अमेरिका लगायतका देशहरुमा पठाउने कामको योखाले पर्दाफास भएपछि झापा र मोरङका शिविरमा रहेका सक्कली शरणार्थीलाई भनें त्यसको मार परेको छ ।
