दमक, २१ साउन| नेपालको लाइफलाइन मानिने पूर्व–पश्चिम राजमार्ग आज बिहानबाट ठप्प छ। कारण – शिवसताक्षी नगरपालिका–१० स्थित भालुखोलामा एशियन हाइवे निर्माणको क्रममा बनाइएको अस्थायी डाइभर्सन भत्किएको हो।
बिहान करिब ५ः३० बजेदेखि राजमार्ग पूर्ण रूपमा अवरुद्ध भएको जिल्ला ट्राफिक प्रहरी कार्यालय, झापाका प्रमुख प्रहरी निरीक्षक गणेश पौडेलले जानकारी दिनुभयो। भालुखोलामा ह्युमपाइप लगाएर बनाइएको डाइभर्सनको साइडको माटो खोलाको भेलले कटान गरेपछि डाइभर्सन भासिएको हो।
यस दुर्घटनापछि सवारीसाधनहरू दुईतर्फी रूपमा रोकिएका छन्, र सयौं यात्रुहरू गन्तव्यमै अलपत्र परेका छन्।
स्थिति गम्भीर बनेको भन्दै वैकल्पिक मार्ग प्रयोग गर्न सुरक्षाकर्मीले सवारीहरूलाई निर्देशन दिएका छन्। राजमार्ग सुचारू बनाउन निर्माण कम्पनी, सुरक्षाकर्मी, र स्थानीय तहको संयुक्त प्रयास जारी छ।
