बिर्तामोड | २७ साउन | पत्रकारिता क्षेत्रमा निष्पक्ष र सामाजिक न्यायको आवाज बनेर अघि बढ्ने पत्रकारहरूलाई सम्मान गर्ने कार्य झापामा निरन्तर चलिरहेको छ।
यहि क्रममा प्रेस चौतारी नेपाल झापाले संस्थापक अध्यक्ष नेत्र प्रसाद पाठकको स्मृतिमा स्थापित लेखनवृत्ति आगामी साउन ३० गते पत्रकार रमा दाहाललाई प्रदान गर्ने निर्णय गरेको छ।
प्रेस चौतारी झापाको मंगलबार बसेको बैठकले पत्रकार दाहाललाई उत्कृष्ट समाचार लेखनको लागि लेखनवृत्ति प्रदान गर्ने प्रस्तावलाई अनुमोदन गरेको उपाध्यक्ष राजु पोखरेलले जानकारी दिनुभयो ।
कान्तिपुर टिभिमा दाहालले छ महिना अघि प्रकाशित तथा प्रशारित दर्जनौं समाचारमध्ये विशेष गरी बाह्रदशी गाउँपालिकामा मुस्लिम र मधेशी समुदायका महिलाहरू न्यायमा पहुँच नपाएको विषयलाई प्राथमिकताका साथ उजागर गरेको समाचारलाई छनोट गरिएको प्रेस चौतारी झापाका अध्यक्ष प्रदीप परियारले जानकारी दिनुभयो ।
लेखनवृत्ति छनोटका लागि अध्यक्ष परियारको संयोजकत्वमा तीन सदस्यीय समिति गठन गरिएको थियो, जसमा फाँट इञ्चार्ज मनकुमार गदाल र सचिव युवराज आचार्य सदस्य थिए। समितिले विभिन्न उत्कृष्ट समाचार संकलन गरी पत्रकार दाहाललाई यस वर्षको लेखनवृत्ति प्राप्तकर्ता सिफारिस गरेको थियो।
प्रेस चौतारी झापाले हरेक ६ महिनामा उत्कृष्ट समाचार लेख्ने पत्रकारलाई संस्थापक अध्यक्ष नेत्र प्रसाद पाठकको नाममा स्थापित यो सम्मान प्रदान गर्ने परम्परा निरन्तरता दिने निर्णय गरेको छ।
साउन ३० गते हुने कार्यक्रममा पत्रकार दाहाललाई लेखनवृत्ति प्रदान गरिने साथै नारी सञ्चार गृह झापामा निर्वाचित कार्यसमितिलाई बधाई ज्ञापन र तीज मिलन कार्यक्रम पनि आयोजना गरिने प्रेस चौतारी झापाले जनाएको छ।
