दमक, २८ साउन – दैनिक अपराध नियन्त्रण, सडक सुरक्षा र नागरिक सेवामा खटिने प्रहरी कार्यालयमा आज भने फरक दृश्य देखियो। अपराधी पक्रन, भीड नियन्त्रण गर्न वा आकस्मिक घटनामा दौडिन व्यस्त रहने सुरक्षाकर्मीहरू आज स्वास्थ्यकर्मीहरूको परीक्षणका क्रममा देखिए।
इलाका प्रहरी कार्यालय दमकमा आयोजना गरिएको स्वास्थ्य शिविरमा दाँतको स्वास्थ्य परीक्षणदेखि आँखाको दृष्टि परीक्षणसम्म र सामान्य स्वास्थ्य जाँचसम्मका सेवा प्रदान गरियो।
खुशी खुस्वु सीप विकास तालिम केन्द्र दमकको आयोजना, इलाका प्रहरी कार्यालय दमकको संयोजन तथा ओम शान्ति डेन्टल हस्पिटल, विर्ताज्योति आँखा अस्पताल र दमक हस्पिटल एण्ड रिसर्च सेन्टर प्रालि दमकको प्राविधिक सहयोगमा सम्पन्न भएको हो ।
कार्यक्रमकी संयोजक तथा खुशी खुस्वु सीप विकास तालिम केन्द्रकी प्रोपाइटर जमुना पौडेल अधिकारीले सीप विकासले व्यवसायसँगै सामाजिक उत्तरदायित्वका क्षेत्रमा पनि निरन्तर काम गर्दै आएको उल्लेख गर्दै, समुदाय क्षेत्रमा नियमित रूपमा स्वास्थ्य शिविर आयोजना गर्दै आएको र सरकारी क्षेत्रमा समेत सहयोग र्पुयाउँदै आएको बताउनुभयो।
ओम शान्ति डेन्टल हस्पिटलका सञ्चालक कमल गैरेले स्वास्थ्यको महत्त्वमा जोड दिँदै, आफ्नो अस्पतालले स्वास्थ्य शिविरमार्फत नागरिक र सुरक्षाकर्मी दुवैका लागि अवसर प्रदान गर्दै आएको धारणा राख्नुभयो ।
प्रहरी कार्यलयमा गरिएको यो स्वस्थ्य शिविर केवल जाँच मात्र होइन, प्रहरी कर्मचारीहरूको मनोबल वृद्धि गर्ने अवसर पनि बनेको छ । नागरिरकाको सेवामा खटिनेहरूले आफ्नो स्वास्थ्यलाई प्राथमिकता दिन सके, त्यसको प्रत्यक्ष असर उनीहरूको कार्यक्षमता र जनसेवामा पर्ने बिश्वास यसका आयोजकले लिएको छ ।
