दमक,३० साउन । जंगली हात्तीको आक्रमणबाट घाइते दमककी ४७ वर्षीया सुनिता राईको उपचारका क्रममा मृत्यु भएको छ । दमक–१ बरगाछीनजिक गत साउन ११ गते बिहान मर्निङ वाकमा जाँदै गर्दा जंगली हात्तीको आक्रमणमा परी घाइते भएकी राईको उपचारका क्रममा शुक्रबार बिहान विराटनगरको न्युरो अस्पतालमा मृत्यु भएको प्रहरीले जनाएको छ ।
उनको टाउको, दाहिने आँखी भौ, दुबै खुट्टा, बाँया हात र शरीरको बिभिन्न भागमा चोट लागेको थियो । साउन ११ गते बिहान करिब सवा ४ बजे सुनिता र उनकी बहिनी ४२ वर्षीया कविता राईलाई हात्तीले आक्रमण गरेको थियो।
दमक अस्पतालमा सामान्य उपचारपश्चात् दुवैलाई थप उपचारका लागि विराटनगर लगिएको थियो। कविता अहिले पनि उपचाररत रहेको प्रहरीले जनाएको छ ।
