धरान,३१ साउन ।सप्तकोसी नदीमा डुबेर एक किशोरी बेपत्ता भएकी छिन्। सप्तकोसी नदी किनारामा हिँडिरहेका एक पुरुषको भीरबाट झरेको ढुङ्गाले लागेर मृत्यु भएको प्रहरीले जनाएको छ।
सुनसरीको बराहक्षेत्र नगरपालिका–१ स्थित चतरा–बराहक्षेत्र सडकमा स १० प ७८२१ नम्बरको मोटरसाइकलमा यात्रा गरिरहेका सप्तरीका ३० वर्षीय जीवन साहलाई भीरबाट झरेको ढुङ्गा टाउकोमा लाग्दा उनको घटनास्थलमा नै मृत्यु भएको इलाका प्रहरी कार्यालय महेन्द्रनगरका प्रहरी निरीक्षक दिवस कुँवरले जानकारी दिनु भएको छ । मोटरसाइकलको पछाडि सवार रहेका सप्तरीकै धर्मेन्द्र कुमार साह सामान्य घाइते भएको उहाँले बताउनु भयो ।
त्यस्तै सप्तकोसी नदीमा डुबेर धरान उपमहानगरपालिका–१६ कि १९ वर्षीय अनिता राई बेपत्ता भएकी छिन। बाबू जीवन राई सङ्गै बराह क्षेत्र मन्दिरको दर्शन गरेर फर्कने क्रममा चतराघाटस्थित दुधपानी खोलामा मोटरसहित बाबुछोरीलाई खोलाले बगाएको थियो। खोलाको बाढीले बगाएर दुबैलाई ५० मिटरको दूरीमा रहेको सप्तकोसी नदीमा पुर्याएको प्रहरीले जनाएको छ ।
बाबु जीवनलाई भने स्थानीयले तत्काल उद्धार गरी बीपी कोइराला स्वास्थ्य विज्ञान प्रतिष्ठान धरानमा उपचारका लागि भर्ना गरेका छन्। छोरी अनिता सप्तकोसीमा डुबेर बेपत्ता भएकी छिन्। उनको अवस्था अझै पत्ता लगाउन नसकिएको प्रहरी निरीक्षक कुँवरले बताउनु भयो। अनिताको खोजी गर्न नेपाल प्रहरी, सशस्त्र प्रहरी र स्थानीय बासिन्दा लागि परेका छन्।
त्यस्तै चतरादेखि बराहक्षेत्र मन्दिर जाने सडक पहिरो खसेर अवरुद्ध भएको छ। पहिरोले सडक पुरेपछि बराह क्षेत्र मन्दिर दर्शन गर्न गएका तीर्थयात्रीहरू घर फर्कन पाएका छैनन्। पहिरोले पुरेको सडक पन्साएर सडक सुचारु गर्ने पहल भइरहेको सुनसरीका प्रमुख जिल्ला अधिकारी धर्मेन्द्रकुमार मिश्रले बताउनु भयो ।
