दमक, साउन ३१ । कमल गाउँपालिका–५ पाडाजुगी चोकस्थित इस्कोन मन्दिर परिसरमा डीपीएल कमलकोे आयोजनामा एक दिने निशुल्क दात तथा फिजिसियन सम्बन्धीको स्वास्थ्य शिविर सम्पन्न भएको छ । श्रीकृष्ण जन्माष्टमीको अवसर पारेर मन्दिरमा आएका भक्तजनलाई लक्षित गर्दै स्वास्थ्य सुरक्षामा ध्यान दिँदै शिविर आयोजना गरिएको हो ।
शिविर ओम शान्ति डेन्टल हस्पिटल र दमक हस्पिटल एण्ड रिसर्च सेन्टर प्रा.लि.को प्राविधिक सहयोगमा सम्पन्न भएको थियो। डिपिएल कमल टिन्स बोर्डका अध्यक्ष प्रज्वल पाठकका अनुसार धार्मिक अवसरलाई सदुपयोग गर्दै समुदायमा स्वास्थ्य सम्बन्धी जनचेतना फैलाउने उद्देश्यले शिविर आयोजना गरिएको हो।
ओम शान्ति डेन्टल हस्पिटलका सञ्चालक कमल गैरेले पछिल्लो समय निरन्तर रूपमा यस्ता शिविरहरू आयोजना गरिँदै आएको जानकारी दिए। उनले समाजमा दन्त स्वास्थ्यप्रति जनचेतना अभिवृद्धि गर्ने उद्देश्य रहेको र शिविरमा सहभागी हुने सेवाग्राहीहरूलाई अस्पतालमा थप उपचारका लागि २५ प्रतिशत छुटको व्यवस्था गरिएको पनि बताए ।
शिविरमा इस्कोन मन्दिरमा भक्ति गर्न आएका अधिकांश भक्तजनले दन्त परीक्षण गराएका थिए। सहभागीहरूले ओम शान्ति डेन्टलको सेवा, प्राविधिक दक्षता र मित्रवत व्यवहारप्रति सन्तुष्टि व्यक्त गरेका थिए।
