विराटनगर, १३ भदौ । कोशी प्रदेशका मुख्यमन्त्री हिक्मत कुमार कार्की र नेपालस्थित जापानी राजदूत महामहिम माईडा टोरुबीच शुक्रबार विराटनगरस्थित मुख्यमन्त्री तथा मन्त्रिपरिषद्को कार्यालयमा भेटवार्ता भएको छ।
भेटमा दुई देशबीचका आपसी हितका विषयमा छलफल भएको मुख्यमन्त्रीका जनसम्पर्क सल्लाहकार रवि खनालले जानकारी दिनुभयो।
सो अवसरमा मुख्यमन्त्री कार्कीले नेपाल–जापान सम्बन्ध ऐतिहासिक र मित्रतापूर्ण रहेको चर्चा गर्दै नेपालको विकासमा जापानले पु¥याएको योगदान प्रशंसनीय भएको बताउनुभयो। विशेष गरी पूर्वाधार विकासमा जापानले गरेको सहयोग महत्वपूर्ण रहेको उल्लेख गर्दै उहाँले कोशी प्रदेशमा कृषि, सूचना प्रविधि र पर्यटन क्षेत्रमा समेत सहयोग गर्न आग्रह गर्नुभयो।
जवाफमा राजदूत माईडा टोरुले नेपाल र जापानबीचको सम्बन्ध सुमधुर रहेको स्मरण गर्दै औद्योगिक विकास तथा कृषि क्षेत्रमा सहयोग गर्न जापान तयार रहेको बताउनुभयो।
भेटघाटमा प्रदेशको समग्र विकास र समृद्धिका विषयमा समेत व्यापक कुराकानी भएको जनाइएको छ।
