लेटाङ, १३ भदौ । १८औँ राष्ट्रिय पुस्तकालय दिवसको अवसरमा “हाम्रो पुस्तकालय : हाम्रो भविष्य” भन्ने मूल नारासहित लेटाङमा स्थापना गरिएको शान्ति सामुदायिक पुस्तकालय तथा स्रोत केन्द्र शुक्रबार एक विशेष समारोहबीच उद्घाटन गरिएको छ।
कोशी प्रदेशका मुख्यमन्त्री हिक्मत कुमार कार्की, नेपालका लागि जापानका राजदूत महामहिम माईडा टोरु र लेटाङ नगरपालिकाका नगर प्रमुख भूपेन्द्रकुमार लावतीले संयुक्तरूपमा पुस्तकालयको उद्घाटन गर्नुभयो।
उद्घाटनपछि मुख्यमन्त्री कार्कीले पुस्तकालयलाई ज्ञान, चेतना र सामाजिक रुपान्तरणको आधारस्तम्भको रूपमा व्याख्या गर्नुभयो। उहाँले भन्नुभयो, “यस पुस्तकालयले लेटाङ र आसपासका क्षेत्रमा शैक्षिक गतिविधिलाई थप सबल बनाउने छ। युवा पुस्ताले अध्ययन र अनुसन्धानमार्फत भविष्यलाई समृद्ध बनाउन यसलाई आधार बनाउन सक्नेछन्।”
जापानका राजदूत माईडा टोरुले स्थानीयस्तरमै समुदायलाई शैक्षिक स्रोत उपलब्ध गराउने पहल सराहनीय भएको उल्लेख गर्नुभयो। उहाँले भन्नुभयो, “पुस्तकालयले केवल किताब मात्र होइन, संस्कार र मूल्य पनि बाँड्छ। यसलाई सबल बनाउन सबैको सहयोग जरुरी हुन्छ।”
नगर प्रमुख लावतीले नगरपालिकाले शैक्षिक तथा सांस्कृतिक अभियानमा निरन्तर सहयोग गर्ने प्रतिबद्धता जनाउनुभयो। उहाँले पुस्तकालयलाई समुदायमै टरको साझा थलोका रूपमा अघि बढाइने जानकारी दिनुभयो।
शान्ति सामुदायिक पुस्तकालय तथा स्रोत केन्द्रमा अध्ययन कक्ष, बाल पुस्तकालय, डिजिटल पुस्तक सेवा, ई–लाइब्रेरी, तथा स्थानीय इतिहास, संस्कृतिसम्बन्धी सामग्री राखिएको छ। विद्यार्थी, शिक्षक, अनुसन्धानकर्ता र आमपाठकलाई लक्षित गरी पुस्तकालयलाई आधुनिक प्रविधिमैत्री बनाउन पहल गरिएको आयोजकले जनाएको छ।
स्थानीयले पुस्तकालय स्थापनाले नयाँ पुस्तामा पढ्ने संस्कारलाई पुनर्जीवित गर्ने विश्वास व्यक्त गरेका छन्। कार्यक्रममा विद्यालयका शिक्षक, विद्यार्थी, सरोकारवाला संस्था र समाजसेवीको उल्लेख्य उपस्थिति थियो।
