दमक, २१ भदौ / उज्यालो खबरका सम्पादक एवम् सर्जक भूपेन्द्रराज तिम्सिनालाई नेपाल लाइब्रेरी फाउण्डेशन् नेपाल झापा शाखाले सम्मानित गरेको छ ।
१८ औं पुस्तकालय दिवसका अवसरमा फाउण्डेशनको गृह पुस्तकालयले दमकस्थित जीवनचक्र समाजको कार्यालयमा आयोजना गरेको साहित्यिक कार्यक्रममाझ तिम्सिनालाई सम्मानित गरिएको हो । कार्यक्रमका प्रमुख अतिथि दमक प्रज्ञा प्रतिष्ठानका संस्थापक अध्यक्ष हेमनाथ अधिकारी, फाउण्डेशन झापा अध्यक्ष डा. लेखनाथ न्यौपाने, साहित्य कला संगमका अध्यक्ष बिन्दु दहाल मूकदर्शकसहितले दोसल्ला र सम्मानपत्रले सम्मानित गर्नुभयो ।
मोरङको पथरी शनिश्चरे घर भई विगत ३० वर्षदेखि पत्रकारिता, साहित्य र कलाकारितामा शालिन र इमान्दारितापूर्वक सक्रिय रहेकोप्रति तिम्सिनालाई सम्मानित गरिएको उल्लेख छ । आफ्नो रचनासहित मन्तव्य राख्दै तिम्सिनाले आफ्नो पत्रकारिता र सृजना यात्रामा दमकसंग १५ वर्ष प्रत्यक्ष संलग्न रहेर समाज रुपान्तरणको कोशिस गरिरहेको जनाउनु भयो ।
कार्यक्रममा, प्रमुख अतिथि अधिकारीले समाजमा पठन संस्कृतिको विकास आजको आवश्यकता रहेको चर्चा गर्दै फाउण्डेशनले पनि रचना वाचनसंगै पढ्ने कुराको बानी गराउने महत्वपूर्ण भूमिका निर्वाह गर्नुपर्ने धारणा राख्नु भयो । पठन संस्कृतिको विकासमा टेवा पुर्याउन उहाँले संस्थालाई २ दर्जन बढी पुस्तक हस्तान्तरण गर्नुभयो । उहाँसंगसंगै शान्तप्रसाद भट्टराई, बाबुराम न्यौपानेले पनि पुस्तक हस्तान्तरण गर्नुभयो ।
पठन संस्कृतिको विस्तारका क्रममा मेघनाथ बन्धुले हेमनाथ अधिकारीको नियात्रा संग्रह ‘उत्तरी ध्रुवतिर बरालिँदा’, विष्णु न्यौपानेले भवानी खतिवडाको नियात्रा संग्रह ‘प्रणाम सगरमाथा’ र गोपाल दहालले दुर्गा काफ्लेको उपन्यास ‘चाँदनी’को समीक्षात्मक टिप्पणी गर्नुभयो ।
कार्यक्रममाझ झाँक्रीखोले, कृष्ण उदासी, विवेक क्षेत्री दुलाल, दुर्गा काफ्ले, बाबुराम न्यौपानेसहितले रचना वाचन गर्नुभयो । कार्यक्रमका अध्यक्ष डा.लेखनाथ न्यौपानले पठन संस्कृतिको विकासमा संस्थाले कदम अघि बढाउँदै जाने लक्ष्यका बारेमा जानकारी गराउनु भयो ।
