बिर्तामोड | २५ भदौ | देशमा उत्पन्न विषम परिस्थितिको कारण सुरक्षाकर्मीको उपस्थिति न्यून हुने अवस्था सिर्जना भएपछि चोरी, डकैतीजस्ता आपराधिक गतिविधि रोकथामका लागि झापाको बिर्तामोडमा नागरिक प्रहरी गठन गरिएको छ।
‘आफ्नो ठाउँ, आफ्नै सुरक्षामा’ भन्ने नारासहित सुरु गरिएको यो अभियानलाई सुरक्षाको वैकल्पिक संरचना भनेर लिइएको छ।
प्रारम्भिक चरणमै करिब १ हजार नागरिक प्रहरी परिचालन गर्ने निर्णय गरिएको यसको नेतृत्व सन्तोष घिमिरेले जानकारी दिनुभयो । उहाका अनुसार सुरक्षाको खाडललाई तत्कालै टार्न र आपराधिक गतिविधि रोक्न नागरिक प्रहरीले नेपाली सेनासँग पनि समन्वय गर्दै काम गर्नेछ।
घिमिरेसँगै विमोचन पोख्रेल, खगेन्द्र महतो, आयुष बस्नेत, उमेश राजवंशी र तेजराज कोइरालालाई फोकल पर्सन तोकिएको छ। उनीहरूले वर्तमान परिस्थितिको लाभ उठाएर असामाजिक तत्वहरू सक्रिय हुन नदिन नागरिक प्रहरीलाई अस्थायी विकल्पका रूपमा अघि सारेको बताएका छन्।
सार्वजनिक कार्यक्रममा सहभागीहरूले नेपालको नक्सा अंकित “नागरिक प्रहरी” लेखिएको विशेष भेष्ट लगाएर गस्ती गर्ने जानकारी दिएका छन्। उनीहरूले टोल–टोलमा नागरिक प्रहरी गठन गर्न र सबैलाई यसमा सक्रिय सहभागिताका लागि आह्वान समेत गरेका छन्।
