काठमाडौं,२८ भदौ । मंगलबारदेखि ठप्प सार्वजनिक सवारी साधनको शनिबार देखि आवागमन सुरू भएको छ। कफ्र्यू र निषेधाज्ञा हटेसँगै शुक्रबार फाट्टफुट्ट मात्र चलेका सवारी साधन शनिबार बिहानदेखि बाक्लो संख्यामा देखिएका हुन् ।
सार्वजनिक बससँगै ट्याक्सी लगायतका सवारी साधन नियमित रूपमा सञ्चालनमा आएका छन्। हिजो नै स्व इच्छाले काठमाडौंबाट अन्य जिल्लामा बसहरू गएका थिए। संघीय सरकारसँग कुनै समन्वय भइ नसके पनि स्थानीय प्रशासनसँगको समन्वयमा लामो तथा छोटो दूरीका सवारी साधन चलाउन अनुमति दिइएको नेपाल यातायात व्यवसायी राष्ट्रिय महासंघका वरिष्ठ उपाध्यक्ष सरोज सिटौलाले जानकारी दिनु भयो ।
सिटौलाका अनुसार जेनजी आन्दोलनले रोकिएको लामो तथा छोटो दुरीको सवारीसाधन शनिबार देखि चल्न थालेका छन्। शनिबार बिहान गोँगबु बसपार्कबाट बाहिरी जिल्लाका लागि बसहरू छुटेका छन्। जनजीवन सहज हुँदै गएपछि पसलहरू खुल्न थालेका छन्।
