काठमाण्डौ,३ असोज। ऊर्जा, जलस्रोत तथा सिंचाइ, भौतिक पूर्वाधार र शहरी विकास मन्त्रालय अन्तर्गतका लामो समयदेखि काम नभइ अलपत्र जीर्ण विकास आयोजनाको ठेक्का तोडिने भएको छ । मन्त्री कुलमान घिसिङले ३ वटै मन्त्रालयका सचिव र विभागीय प्रमुखलाई जीर्ण आयोजनाको सूची तत्काल तयार गरी पेश गर्न निर्देशन दिनुभएको छ ।
३ वटै मन्त्रालयको कामकारबाहीको जानकारी लिएपछि मन्त्री घिसिङले काम नगर्ने निर्माण व्यवसायीको अनुहार हेरेर आयोजनालाई अलपत्र अवस्थामा राख्न नदिने बताउनुभयो । सिंचाइअन्तर्गत राष्ट्रिय गौरवको सुनकोशी मरिण बहुउद्देश्यीय, भौतिक पूर्वाधार अन्तर्गत सयौँ सडक र एक सय भन्दा पुल निर्माणका आयोजना अलपत्र रहेका छन् । मन्त्री घिसिङले निर्माणाधीन संघीय संसद भवन जसरी पनि आउँदो पुस भित्रै सम्पन्न गर्नुपर्ने बताउनु भएको छ ।
संसद भवन ३ वर्षभित्र निर्माण सम्पन्न गर्ने गरी २०७६ सालको असोजमा ठेक्का सम्झौता भएको थियो । पाँचौ पल्ट थपिएको ठेक्का सम्झौताको म्याद आउँदो पुसमा सकिँदैछ । आयोजनाको भौतिक प्रगति ८६ प्रतिशत रहेको छ । ऊर्जा, जलस्रोत तथा सिंचाइ, भौतिक पूर्वाधार र शहरी विकास मन्त्री घिसिङले आफ्नो कार्यलय अन्तर्गतका निकायमा हुने अनियमिता रोक्न निर्देशन दिनुभएको छ । मन्त्री घिसिङले अनियमिता फेला परेमा सङ्लग्नलाई कारबाही गर्ने चेतावनी समेत दिनुभयो ।
