दमक, ३ असोज । नेकपा एमालेका केन्द्रिय सदस्य तथा झापा जिल्ला ईन्चार्ज रोमनाथ ओलीले अहिले देश कता जान्छ भन्ने कुरा धेरै मानिसले अनुमान गर्न नसक्ने अबस्था रहेको बताउनुभएको छ । प्रतिनिधि सभा बिघठन भएको र एकथरी मानिसहरु अहिले पनि संबिधान खारेजी हुनुपर्छ भनेर लागिरहेको उहाले बताउनुभयो । संबिधान दिवसका अबसर पारी नेकपा एमाले दमक नगर कमिटीले आयोजना गरेको कोणसभामा बोल्दै ईन्चार्ज ओलीले संबिधानमा रहेको कमजोरीलाई संशोधन गरेर अगाडी बढ्न सकिने उल्लेख गर्नुभयो ।
दमक नगरपालिका वडा नं. ५ पूर्वाञ्चल बेकरी अगाडि दिउँसो ३ बजे सुरु भएको कोणसभा ४ः१५ मा सम्पन्न भएको थियो। नेकपा एमाले झापा जिल्ला इन्चार्ज रोमनाथ ओलीको प्रमुख आतिथ्यतामा भएको कार्यक्रममा १५० जना हाराहारी को उपस्थिति रहेको थियो । कार्यक्रमको अध्यक्षता नेकपा एमाले दमक नगर कमिटी अध्यक्ष राम पौडेलले गर्नुभएको थियो।
२०७२ साल असोज ३ गते जारी नेपालको संविधान–२०७२ जनताद्वारा निर्वाचित संविधानसभाले निर्माण गरेको हो। संघीय लोकतान्त्रिक गणतन्त्रात्मक संरचनालाई संस्थागत गर्दै संविधानले नेपाललाई आधुनिक लोकतान्त्रिक मुलुकको रूप दिन सफल भएको छ। यसले सर्वसाधारण नागरिकलाई मौलिक अधिकारसहित राज्यका प्रत्येक तहमा सहभागिताको सुनिश्चितता गरेको छ।
