काठमाण्डौ,७ असोज। काठमाण्डौ ओहोरदोहोर गर्ने मुख्य सडकमा लगातारजसो पहिरो खस्ने समस्याले यात्रुको बिचल्ली भही रहेको छ । नागढुंगा–मुग्लिन सडकखण्ड अन्तर्गतको धादिङको बेनीघाट नजिकै र मुग्लिन–नारायणगढ सडकखण्ड अन्तर्गत मुग्लिन नजिकै ठूलो पहिरो खस्दा यात्रुले सास्ती भोग्नु परेको छ । मुग्लिन नजिकै तुइन खोलामा गएको शुक्रवार खसेको पहिरो पन्छाएर सोमबार देखि दुई तर्फी सडक खुले पनि फेरि पहिरो खस्ने समस्या दोहोरि रहेको छ ।
त्यहाँको सडक सामान्य नहुँदै फेरि मुग्लिन–नागढुंगा सडकखण्ड अन्तर्गत बेनीघाटमा गए राति अर्को ठूलो पहिरो खसेर समस्या भएको छ । धादिङको बेनीघाट नजिकै जवाङ खोलामा गएराति खसेको पहिरोका कारण सडक पूर्ण रुपमा अवरुद्ध भएको छ । ठूलो पहिरो झरेका कारण तत्काल पन्छाउन सकिने अवस्था नरहेको धादिङ प्रहरीले बताएको छ ।
गएराति पहिरो पन्छाएर एकतर्फी सडक खुलेलगत्तै फेरि ठूलो पहिरो झरेको हो । पहिरो पन्छाउने काम भैरहेपनि सुक्खा पहिरो झर्ने क्रम नरोकिएकाले तत्कालै पहिरो पन्छाउन सम्भव नभएको प्रहरीले बताएका छन्।
सडक अवरुद्ध हुँदा दशैँमा घर गएका र काम विशेषले हिँडेका यात्रु बीचबाटोमै अलपत्र परेका छन् । यस्तै पहिरो पन्छाएर दुईतर्फी सञ्चालनमा आएको मुग्लिन नारायणगड सडक खण्डमा फेरि पहिरो झर्ने क्रम नरोकिएपछि सडक एकतर्फी मात्रै सञ्चालनमा आएको छ ।
गएको शुक्रवार मुग्लिन–नारायणगढ सडकखण्डको तुइनखोला नजिकै खसेको पहिरो दुई दिनसम्म पन्छाउन नसक्दा यात्रुले लामो समय सास्ती भोग्नु परेको थियो । दुई दिनपछि पन्छाएर खुलाइएको सडकमा ढुङ्गा खस्न थालेपछि फेरि एकतर्फी मात्रै सञ्चालनमा आएको सडक डिभिजन कार्यालय भरतपुरले बताएको छ ।
