विराटनगर,७ असोज । विराटनगर महानगरपालिका–९ धोबियारीमा एक देवरले आफ्नै भाउजुमाथि एसिड प्रहार गरी गम्भीर घाइते बनाएको प्रहरीले जनाएको छ ।
सोमबार दिउँसो २५ वर्षीय श्रवण साह (छोटु) ले २२ वर्षीया भाउजु रागिनी देवी साह माथि एसिड प्रहार गरेका हुन् ।
घाइते रागिनीको हाल विराटनगरस्थित न्यूरो अस्पतालमा उपचार भइरहेको छ र उनको स्वास्थ्य अवस्था सुधारोन्मुख रहेको अस्पतालले बताएको छ । पारिवारिक स्रोतका अनुसार, घटनाको मुख्य कारण पैसाको लेनदेन र सोही विषयमा उत्पन्न भएको विवाद हो।
पीडितका श्रीमान् सन्तोष साहका अनुसार, उनका भाइ श्रवणले भाउजुसँग तीन हजार रुपैयाँ मागेका थिए । रागिनीले आफूसँग भएको दुई हजार रुपैयाँ दिएकी पनि थिइन् । तर, बाँकी एक हजार रुपैयाँ नपाएको निहुँमा विवाद चर्किएको थियो । घटना हुनुभन्दा केही समयअघि पनि श्रवणले दाजु सन्तोषलाई ज्यान मार्ने धम्की दिएको जानकारी पाइएको छ ।
मोरङ प्रहरीकी प्रवक्ता, डिएसपी कोपिला चुडालले घटनाबारे प्रहरीमा जानकारी आएको र एसिड प्रहार गर्ने श्रवण साहको खोजी कार्य तीव्र पारिएको बताउनु भयो । प्रहरीले घटनाको अनुसन्धान सुरु गरिसकेको र खोजी कार्य तिव्र बनाएको उहाँले बताउनु भयो ।
