पोखरा,७ असोज ।पोखराका सहकारी पीडितहरूले मंगलबार सडकमा विरोध प्रदर्शन गरेका छन्। जेनजी प्रदर्शनका नाममा घुसपैठ गरेर सहकारी ठगीको मिसिल र प्रमाणहरू नष्ट गरेको भन्दै पीडितहरूले सडक प्रदर्शन गरेका छन्।
पीडितले पोखराको पृथ्वीचोकबाट विरोध निकालेका थिए। उनीहरूले कारागारबाट भाग्ने र भगाउनेलाई कारबाही गर, कारागारबाट भागेका सहकारी ठगीका अभियुक्तलाई तत्काल पक्राउ गर, अदालत, पोखरा महानगरको सहकारी शाखा लगायत जलाउनेलाई कारबाही गर, सहकारीको मुद्दा प्राथमिकतामा राखेर फैसला गर लगायतका नारा लगाउनुका साथै प्लाकार्ड बोकेका थिए।
प्रदर्शनकारीले पोखरा महानगरपालिकाको कार्यालय जलाउँदा सबभन्दा पहिले सहकारी शाखामा आगो लगाएका थिए। जिल्ला अदालत र उच्च अदालतमा पनि सहकारीको मुद्दा राखिएको फाँटबाट आगो लगाएको पीडितहरूले जनााएका छन्।
सहकारी ठगीका अभियुक्तहरू प्रदर्शनमा घुसपैठ गरेर प्रमाण नष्ट गर्न खोजेको पीडितहरूले आरोप लगाएका छन्। सहकारी बचत पीडित संघर्ष समिति कास्कीका संयोजक किरण श्रेष्ठले नियोजित रूपमै सहकारीको फाइल जलाइएको बताउनु भयो। जेनजीले भ्रष्टाचार विरूद्ध आन्दोलन गर्दा सहकारी ठगीका अभियुक्तहरू घुसपैठ गरेको देखिएको उहाँले बताउनु भयो।
