विराटनगर,७ असोज । भारतबाट नेपालतर्फ ल्याइएको स्रोत नखुलेको १४ लाख ५० हजार नेपाली रुपैयाँ प्रहरीले बरामद गरेको जनाएको छ। मंगलबार दिउँसो १२ बजेर ४५मिनेट तिर विराटनगर महानगरपालिका–१७ मा गरिएको चेकजाँचका क्रममा यो रकम फेला परेको हो। मोरङ प्रहरी प्रवक्ता डीएसपी कोपिला चुँडालका अनुसार अस्थायी प्रहरी पोस्ट मटेरुवाबाट खटिएको असई जागेन्द्र फुयाँल नेतृत्वको टोलीले शंकास्पद रूपमा नेपाल प्रवेश गरेको मोटरसाइकल नियन्त्रणमा लिएको हो।
विराटनगर–१८ का ४१ वर्षीय वीरेन्द्र साहले चलाएको को ३८ प ५८५१ नम्बरको मोटरसाइकलको खानतलासी गर्दा लुकाइछिपाइ राखिएको रकम फेला परेको प्रहरीले बताएको छ। बरामद भएको रकममा १ हजार दरका २८४ थान र ५ सय दरका २,३३२ थान नेपाली नोटहरू रहेका छन्। रकमको स्रोत खुलाउन नसकेपछि प्रहरीले साहलाई पनि नियन्त्रणमा लिएको छ। इलाका प्रहरी कार्यालय रानीका इन्स्पेक्टर कविन राई नेतृत्वको टोलीले यस विषयमा थप अनुसन्धान गरिरहेको जनाएको छ।
प्रहरीको प्रारम्भिक अनुमानअनुसार यो रकम अवैध हुण्डी कारोबारको हुनसक्ने देखिएको छ। अनुसन्धानपछि वास्तविकता पत्ता लाग्ने प्रहरी प्रवक्ता चुँडालले बताउनु भयो। यो घटनाले सीमावर्ती क्षेत्रमा भइरहेको अवैध आर्थिक गतिविधिलाई नियन्त्रण गर्न प्रहरीको निरन्तर सतर्कताको आवश्यकता देखाएको पाइएको छ।
