काठमाडौं,९ असोज। नेकपा माओवादी केन्द्रको केन्द्रीय समितिको सातौं पूर्ण बैठकमा पार्टी अध्यक्ष पुष्पकमल दाहाल ’प्रचण्ड’ ले राजनीतिक एवं संगठनात्मक प्रस्ताव राख्नु भएको छ।
बिहीबारबाट काठमाडौंमा सुरू भएको केन्द्रीय समिति बैठकमा प्रचण्डले अहिलेको केन्द्रीय समिति विघटन गर्दै विशेष महाधिवेशनमा आयोजक कमिटी बनाउने प्रस्ताव राख्नु भएको छ।
त्यस्तै उहाँले तोकिएको समयमा नै निर्वाचन हुनुपर्ने र पार्टीको ध्यान निर्वाचनमा केन्द्रीत गर्नुपर्नेमा जोड दिएको बैठकमा सहभागी माओवादी नेताहरूले बताँउनु भएको छ।
पार्टी अध्यक्ष प्रचण्डले राखेको राजनीतिक एवं संगठनात्मकमाथि प्रदेश अनुसार प्रतिनिधि विभाजन गरी छलफल हुने र समूहका नेताले बैठकमा रिपोर्टिङ गर्ने माओवादीले बताएको छ ।
बैठकमा पदाधिकारी र समूहका नेताले मात्रै धारणा राख्ने कार्यसूचीका बारेमा महासचिव देव गुरुङले बताए पछि केहि नेताले आपत्ति जनाएका थिए।
माओवादी नेता रन्जित तामाङ, सुदन किराती लगायतले हरेक सदस्यले आफ्नो धारणा राख्न पाउनुपर्ने माग राख्नु भएको छ। केन्द्रीय समितिको बैठक शुक्रबार सम्पन्न हुने माओवादीले बताएको छ ।
